La’o Hamutuk, Fongtil no Core Group Transparency-CGT sei realiza enkontru Públiku ida kona-ba Proposta orsamentu Jerál Estadu ba tinan fiskál 2020. Oradór sira mai husi Ministériu finansa, Partidu Opozisaun iha Parlamentu Nasional no Sosiedade Sivíl. Enkontru Públiku ne’e sei realiza iha kinta feira dia 3 Outubru 2019 iha Salaun Katedrál Bebora DILI, tuku 9 too remata iha lorokraik, ho han meudia.
Komité Revizaun Polítika-KROP finaliza ona diskusaun kona-ba Orsamentu Jerál Estadu 2020 iha dia 23 Setembru 2019. Relatóriu KROP nian liga ho OJE 2020 konsellu Ministru apresia da uluk ona iha dia 27 setembru no sei aprova iha dia 2 Outubru 2019.
Bele mai partisipa no halo diskusaun kona-ba liña jerál Orsamentu Jerál Estadu 2020 nian ho oradór sira, bele rona informasaun, dadus sira, medida Orsamentais sira ne’ebé Governu diskute ona no bele konfirma ho reprezentante husi Ministériu Finansa ho difikuldade no preokupasaun sira no bele rona observasaun no sujestaun sira Sosiedade Sivíl nian, bele mós rona perspetiva Bankada Opozisaun FRETILIN nian relasaun ho ezekusaun no Proposta OJE 2020.
Nudár pasu inísiu atu parte hotu bele fahe informasaun, hetan informasaun, diskusaun no konfirmasaun no ajuda ita hotu bele iha koñesimentu ba partisipa di’ak liu tan iha pasu sira tuir mai, liu-liu bele intende no partisipa iha debate sira iha públiku bainhira diskusaun Orsamentu la’o iha Parlamentu Nasional bainhira Governu submete ona ba, iha loron 15 Outubru.
Mai, mai, bele aprende, bele rona, bele konfirma/husu no sei iha esplikasaun husi oradór sira no bele estabelese ligasaun konstrutivu entre Governu, sosiedade sivíl no partisipante sira seluk durante enkontru públiku. Bele hetan informasaun balun relasaun ho proposta Orsamentu Jerál Estadu 2020 iha ne’e; http://www.laohamutuk.org/econ/OGE20/19OGE20.htm, inklui aprezentasaun sira husi enkontru publiku ida ne'e.
Obrigadu barak ba atensaun no Partisipasaun. Celestino Gusmão, 77432621
Subscribe to:
Posts (Atom)
Posts
