Konvite Diskusaun Publiku Lei ba Rai, 19 Jan.

Koalia kona-ba Rai iha Timor Leste komplexu no sensitivu tebes. Asuntu rai ne’e sai preokupasaun ema barak nian, tantu husi povu, estadu Timor-Leste nomos ema husi rai liur. Preokupasaun sira ne’e mosu tanba asuntu rai ne’e bele hamosu konflitu iha komunidade nomos difikulta prosesu dezenvolvimentu.

Ho razaun hirak ne’e Governu Timor-Leste  liu husi Ministeriu Justisa kria ona Esbosu Lei ba Rai atu regula se mak bele sai nain ba rai. Ministra Justisa halo konsultasaun Lei ba Rai iha distritu 13 iha 2009, no hetan aprovasaun husi Konsellu Ministru iha loron 10 Marsu 2010. Lei relasiona ho Rai ne’ebé  aprova inklui Lei ba Rai, Lei Expropriasaun no Lei Fundu Imobiliariu. Lei tolu ne’e atualmente sei iha Komisaun A, Parlamentu Nasional, no Parlamentu Nasional sei halo audensia publika kona-ba Lei ba Rai iha inisiu 2011. Husi parte seluk Sosiedade Sivil, Estudante Universitariu sira ho Komunidade rasik konsidera katak Lei ba Rai ne’e la bazeia ba prinsipius no valores moris Timor nian. Ita bele hetan nformasaun tan kona-ba asuntu Rai iha ne'e.

Ho razaun sira ne’e, La’o Hamutuk sei organiza Diskusaun Publiku ho tema “Oinsa Implikasaun Lei ba Rai ba Povu nia Direitu atu Asesu Rai.” Narador sira mak hanesan:

• Sr. Bernardo de Almeida nudar Asesor Legal iha Ministeriu Justisa
• Representante husi UNMIT
• Sr. Eusebio Guterres nudar Asesor Legal iha Organizasaun Laifet
• Sr. Demetrio Amaral nudar Peskizador ba Sistema Rai Tradisional iha Fundasaun Haburas.

Diskusaun Publiku ne’e sei hala’o iha:

Kuarta, 19 Janeiru 2011.      09:00 - 17:30 OTL
Fatin: Salaun Asosiasaun Hak, Farol (iha Embaixada Brasil nia oin)

Agenda:
08:30-09:00    Registrasaun
09:00-09:15    Introdusaun
09:15-09:35    Bernardo de Almeida: Oinsa substansia Lei ba Rai atu garante povu nia direitu atu asesu ba rai
09:35-09:55    Representante UNMIT: Oinsa Padraun Lei Internasional garante direitu povu nian ba rai no uma
09:55-10:15    Eusebio Guterres: Oinsa Impaktu Lei ba Rai ba povu nia direitu atu asesu ba Rai
10:15-10:35    Demetrio de Amaral: Oinsa Sistema Rai Tradisional       
10:35-10:50    Snack
10:50-12:30    Husu no Hatan
12:30-13:30    Han Meiu-Dia
13:30-14:30    Diskusaun Grupu
14:30-16:30    Apresentasaun Plenaria
16:30-17:00    Taka no Snack   

Ba ita bot sira nia partisipasaun no koperasaun ami hatoo obrigada wain.

Ami saran lian,
Ines Martins N. Soares
Peskizadora La’o Hamutuk
+670 725 8724