LH husu Prezidente atu sura didiak risku no legalidade TimorGAP

Iha 25 Maiu, Konseilu Ministru Timor-Leste nian aprova Dekretu-Lei atu kria Kompania Mina-rai Nasional ho naran Timor GAP, EP (hodi troka naran PETRONATIL). Prezidente Jose Ramos-Horta tenke deside atu promulga ka veta ba Dekretu-Lei ne’e.

Iha nasaun seluk, kompania mina-rai estadu nian ne’e dala barak akompanha ho pratika anti-demokrasia no illegal, korupsaun, estragus ambiental no konsekuensia negative seluk-seluk. La’o Hamutuk fiar katak kria kompania mina-rai nasional sei fo impaktu ba futuru Timor-Leste no tenke halo ho kuidadu, no tuir maneira Konstitusional.

Tamba ne’e, ami hakerek karta ida ba Prezidente (Ingles) husu nia atu foti desizaun ne’ebe matenek ne’ebe sei benefisia povo Timor-Leste tomak no salvaguarda rekursu naun-renovavel ita nia nasaun nian. Ami nia karta ne’e akompania ho submisaun (Ingles) ne’ebe ami haruka ba Sekertariadu Estadu Rekursu Naturais iha Novembru tinan kotuk kona-ba esbosu tuan legislasaun ida ne’e, tamba ami seidauk hetan versaun final. Ami nia submisaun foti pontus importante sira hanesan tuir mai:

• Kompania Mina-rai Nasional ne’e perigozu, no ita tenke aprende husi falansu no susesu husi rai seluk.
• Kompania Mina-rai Nasional tenke estabelese husi lei Parlamentu, laos dekretu lei Governu nian.
• Kompania Mina-rai Nasional tenke serve povo Timor-Leste.
• Kompania Mina-rai Nasional tenke tuir regulamentu ba ajensia estadu nian.
• Kompania Mina-rai Nasional presiza atu transparante no akuntavel.
• Kompania Mina-rai Nasional tenke dezeinha atu prevene korupsaun.
• Kompania Mina-rai Nasional labele hetan poder ne’ebe maka’as liu fali saida mak nia hakarak.
• Kompania Mina-rai Nasional nia lukru tenke ba liu Fundu Petroleu, laos investe deit iha kompania.
• Kompania Mina-rai Nasional labele hetan poder atu halo impresta ka fan asoens (bonds)/obligasi.

Tuir ligasaun ida ne’e atu hetan informasaun no analiza tan kona-ba asuntu ne’e.