Perguntas Eleitores ba Kampaña Partidu Politiku sira

To see this blog entry in English, click here. 
Atu lee resposta husi partidu politiku balun, hili iha ne'e.

Atu apoiu sidadaun sira nia partisipasaun iha eleisaun, La'o Hamutuk foin publika pamfletu ida ho preguntas eleitor sira bele husu ba kada partidu polítiku. Bele download iha ne'e hanesan PDF, (mos Ingles) ka hetan informasaun tan kona ba prosesu eleisaun husi LH nia website.

La’o Hamutuk nudár Organizasaun Sosiedade Sivíl ne’ebé monitor no analiza prosesu dezenvolvimentu. Iha Jullu ita-boot sira sei hili Deputadu/a sira iha Parlamentu Nasionál. Prosesu ne’e nudár dalan demokrasia atu determina futuru ita-boot sira no jerasaun futuru.

Daudauk ne’e prosesu eleitorál ba kampaña polítiku la’o hela, ami hanoin partisipasaun ita-boot sira sei ajuda futuru ukun-na’in sira atu deside polítika ne’ebé di’ak no apropriadu ba kontextu reál Timor-Leste.

Aleinde atu ajuda ita-boot sira hodi komprende kada partidu nia programa iha tinan lima oin mai, no mós bele ajuda hodi vota tuir konsiénsia no matenek.

Nune’e ami distribui perguntas atu ajuda ita-boot sira hodi partisipa ba prosesu kampaña diálogu. Eleitores sira bele utiliza kada perguntas hodi husu ba partidu polítiku sira durante sira hala’o sira nia kampaña iha fatin ne’ebé de’it.

Perguntas hirak ne’e mak hanesan tuir mai:

Ekonomia

• Daudauk ne’e, metade ekonomia rai laran no mós besik atividade estadu nian tomak finansia husi reseitas petrolíferu. Polítika saida mak ita-boot nia partidu polítiku sei halo atu kontinua servisu estadu no sustenta povu nia moris bainhira mina-rai maran no Fundu Petrolíferu sai mamuk iha tinan 12 tuir mai?
• Daudauk ne’e, liu metade orsamentu estadu gasta ba infrastrutura fízika, liu-liu eletrisidade. No aloka uitoan de’it ba rekursu umanu, hanesan edukasaun no saúde Ita hanoin di’ak atu kontinua prioridade hanesan ne’e, ka atu dezenvolve kapasidade povu Timor-Leste atu lori nasaun ba oin?
• Tinan 10 tuir mai, númeru populasaun joven sei sa’e maka’as, no dezempregu bele aumenta kompara ohin loron. Polítika saida mak ita-boot nia partidu polítiku sei trasa atu ajuda Timor-Leste hodi bele enfrenta problema ne’e, no rekursu umanu saida mak ita-boot nia partidu polítiku sei prioritiza atu dezenvolve nasaun ida ne’e?
• Governu Timor-Leste foin hahú atu empresta husi rai li’ur, no iha planu atu empresta barak liu tan atu finansia Planu Estratéjiku Dezenvolvimentu Nasionál. Oinsá Timor Leste bele selu fali tusan, bainhira mina no gás hotu ona?

• Daudauk ne’e Governu prioritiza mós projetu Tasi Mane iha Kosta Súl ne’ebé sei sadere ba kampu gas Greater Sunrise. Karik kadoras Greater Sunrise labele lori mai iha Timor-Leste, projetu ne’e atu sadere tan ba saida? Ita-boot nia partidu polítiku nia hanoin katak ne’e investimentu ka sei gasta de’it osan povu nian?
• Karik Governu dezenvolve duni projetu Tasi mane ne’e, ita nia partidu polítiku nia hanoin katak projetu ne’e sei fó servisu ba ema Timor barak? ka benefísiu de’it ema riku sira duke ema kiak? Oinsá ita nia Partidu nia aproximasaun kona-ba partisipasaun feto ho mane iha projetu ne’e?

Governasaun no Justisa

• Durante okupasaun ilegál Indonézia ne’ebé oho ema besik rihun atus rua hafoin ukun-an impunidade nafatin prevalese, ba Jenerál sira iha Indonézia ne’ebé envolve iha krime kontra umanidade iha Timor Leste, karik ita-boot nia partidu polítiku hanoin ne’e importante ba autór kriminozu sira atu ba hatán iha Tribunál? Polítika saida mak ita nia partidu sei halo atu hakotu impunidade ne’e?
• Daudauk ne’e TL seidauk ratifika Konvensaun Internasionál ba Ema Lakon (International Convention for the Protection of All Person from Enforced Disappearance), ita boot nia partidu polítiku hanoin ne’e presiza atu ratifika? Karik hakarak ratifika, oinsá atu implementa konvensaun ne’e tuir ita-boot nia partidu polítiku sei prefere?

• Korrupsaun nudár obstákulu ba dezenvolvimentu, liu-liu iha nasaun ne’ebé nia orsamentu estadu depende ba reseitas petrolíferu hanesan Timor- Leste. Polítika saida mak ita-boot nia partidu polítiku sei trasa atu prevene korrupsaun, inklui iha Institutu Públiku no Empreza Públiku iha Timor-Leste?
• Daudauk ne’e Timor-Leste esforsu an atu tama ba iha ASEAN maibé iha parte seluk, besik hotu membru ASEAN apoiu okupasaun ilegál Indonézia iha Timor- Leste durante tinan 24. Saida mak ita boot nia partidu polítiku sei halo atu ajuda hapara violasaun direitus umanu iha ASEAN laran hanesan iha Burma no Papua Barat?

Agrikultura

• Eis Prezidente Ramos-Horta veto ba lei tolu kona ba asesu ba rai tanba nia hare lei hirak ne’e bele viola direitu ba povu ki’ik. Oinsá ita boot nia polítika partidu ninian atu proteje no asegura direitu povu ki’ik sira hodi asesu ba rai?
• Polítika saida mak ita nia partidu sei trasa atu dezenvolve ekonomia produtivu ne’ebé sustentável, hanesan agrikultura, atu hamenus dependénsia ba ekonomia husi esportasaun rekursu naun-renovavel? Oinsá ita nia polítika partidu nian hodi hamenus importasaun ai han no nesesidade báziku atu Timor-Leste bele atinje soberania ekonómiku no ai han?