Maiór parte material hirak ne’e bele hetan iha ami nia website. Maibe, asesu internet iha Timor-Leste ki’ik liu no karun liu iha mundu, tanba ne’e ami halo material sira ne’e ho formatu ida ne’ebé fasil ba ema atu hetan no uza no la presiza ba asesu iha internet.
DVD ne’e ami atualiza hodi uza ba treinamentu ne’ebé ami foin halo daudauk ne’e ba jornalista sira kona-ba Fonte Informasaun (mós iha Ingles), treinamentu ne’ebé FOTI-Timor-Leste organiza. Treinamentu ida ne’e foka ba informasaun barak no luan liu kona-ba Timor-Leste ne’ebé bele hetan hosi Governu no fonte seluk.
Dezde tinan kotuk ne’e, La’o Hamutuk fó ona treinamentu no aprezentasaun sanulu resin ba grupu no instituisaun lubuk kona-ba OJE no ekonomia Timor-Leste, fronteira maritima ho Australia, projetu Tasi Mane, Orsamentu Responsivu ba Jéneru, Portal Transparénsia, Transparénsia, pensaun Veteranu, polítika fini no tópiku sira seluk. Ami mós foin atualiza ami nia aprezentasaun kona-ba Rights and Sustainability in Timor-Leste’s Development (Ingles). Versaun Tetun sei mai. Ho hanoin atu halo material ne’e bele asesu hosi ema barak, ami publika aprezentasaun sira ne’e iha ami nia pájina foun iha ami nia website – PowerPoint no PDF, Ingles no Tetun. Bele download no uza ba. Karik ita boot hakarak peskizadór La’o Hamutuk nian ida bele fó treinamentu ruma, ka aprezenta ba grupu ka eventu ruma, bele kontaktu ami iha info@laohamutuk.org ka +670-3321040.
Posts
No comments:
Post a Comment