Governu nia planu sedu … atu antisipa buat ruma?

Timor oan sira sei ba sentru votasaun iha Sábadu semana ne’e atu hili Deputadu/a na’in 65, sira ne’e mak sei deside Timor-Leste nia Primeiru Ministru no Sétimu Governu Konstitusionál. Maske ema barak la ekspeta katak sei iha mudansa signifikante iha estrutura polítika daudaun ne’e nian, maibé governu atuál fó sai ona kontratu boot rua atu asegura sira nia benefísiu rasik,  atu antisipa  votante sira manán  fali kontrola ba sira nia fundu públiku husi ukun na’in sira atuál.

Iha 27 Abril, Komisaun Nasional ba Aprovizionamentu (CNA) anúnsiu katak nia intensaun atu ajudika kontratu ho montante liu tokon $90 atu fornese kombustivel ba sentru elétriku Hera no Betano, ba tinan rua oin mai nian. Iha pasadu, kontratu sira hanesan ne’e fó de’it ba durasaun tinan ida. Tanba posivel atu iha governu foun, entaun kontratu ba tinan rua ne’e asegura benefísiu ba fornesedór atuál sira.

Maske Komisaun Aprovizionamentu lakohi atu hatán ba La’o Hamutuk nia pedidu atu hetan informasaun liután kona-ba tender ida ne’e, presu iha proposta husi kompañia rua ne’ebé manán besik hanesan, no ida ne’e hamosu preokupasaun kona-ba poténsia ba koluzaun. La’o Hamutuk la iha evidénsia adisionál kona-ba aktu ilegál ruma, maibé Esperança Timor Oan (ETO, ne’ebé lidera husi Nilton Gusmão, Xanana Gusmao nia sobriñu) manán kontratu ida montante boot ba Hera, maibé nia proposta fó presu 0.13% ki’ik liu kompara ho proposta ne’ebé hato’o husi SACOM Energy (lidera husi Abilio Araújo, eis lider prinsipál FRETILIN iha tempu funu ne’ebé daudaun ne’e halo hela kampaña ba PLP) nian. Aumezmu tempu, SACOM manán kontratu ba sentrál elétrika Betano, ho proposta ne’ebé 1.8% ki’ik liu kompara ho ETO nian. Pertamina mós tuir konkursu ba kontratu rua ne’e hotu, ho proposta rua ho presu 10% boot liu kompara ho kompañia rua ne’ebé ikus mai manán kontratu.

Aleinde ne’e, tenderizasaun seluk tan anunsia ona iha semana ida ne’e, ne’ebé Komisaun Nasional Aprovizionamentu konvida proposta atu fornese Toyota Prado Land Cruiser 68 ba Parlamentu Nasional. Maske tenderizasaun sei loke to’o 14 Agostu no ita seidauk hatene loos montante presu loloos, maibé Orsamentu Estadu 2017 aloka ona tokon $3.2 atu hola karreta foun ba Parlamentu iha tinan ida ne’e (sa’e husi rihun $86 iha 2016 no rihun $22 iha 2015), entaun ita bele dehan katak kada karreta ida nia folin sei liu  $45,000.


Tinan lima liu ba, Parlamentu gasta tokon haat hodi ba sosa karreta foun ba ninia deputadu/a sira, no bainhira sira nia mandatu remata, deputadu/a sira ne’e bele leilaun karreta tuan sira ba sira nia uzu privadu, ho presu ne’ebé baratu liu. Ita la hatene karik karreta Prado sira ne’e barak mak sei funsiona hela ka lae, maibé tendénsia ba leilaun ida ne’e repete fila fali ona. Komisaun Nasional Aprovizionamentu kolabora ho di’ak kona-ba tender ida ne’e nia informasaun kompara ho detallu tenderizasaun sira ba kombustivel nian. CNA fornese dokumentu tenderizasaun sira ho detallu, inklui espesifikasaun ida ne’e. KNA halo enkontru "pre-bid" iha loron 27 Jullu, no fo sai alterasaun ba dokumentu sira.

Maske anúnsiu sira kona-ba tenderizasaun publika ona iha jornál lokál no iha Ministériu Finansas nia portal, informasaun sira ne’e seidauk fó sai iha media komersiál ka sosiál sira, no La’o Hamutuk hanoin katak importante atu votante sira bele hatene.

Timor-Leste nia reseita petróleu besik atu hotu ona, no biliaun $16 ne’ebé sei rai hela iha Fundu Petrolíferu komesa tun ona. Bainhira votante sira ba vota, ami enkoraja sira atu suporta partidu sira ne’ebé mak iha vizaun ba ekonomia sustentável, diversifikadu, no justu ba Timor oan sira hotu.

Link to this blog in English