14 May 2018

Eleisaun Antesipada fó maioria ba AMP

La’o Hamutuk husi inísiu tau matan ba Eleisaun Antesipada no bele hato’o relatóriu ba rezultadu final ne’ebé bazeia ba CNE nia tabulasaun (sura) husi sentru votasaun hotu. Ami sei publika analiza detalladu liu iha loron hirak oin mai.

Rezultadu mak tuirmai ne’e:
  • AMP: 49.6% = kadeira 34.
  • Fretilin: 34.2% = kadeira 23.
  • PD: 8.1% = kadeira 5.
  • FDD: 5.5% = kadeira 3.
Kada partidu no koligasaun seluk ne’ebé la konsege hetan kadeira iha Parlamentu, hanesan MSD, MDN, PEP no PR, hetan menus husi 1% husi totál votu.

Parlamentu foun sei inklui feto na’in 22 no mane na’in 43, maibé númeru rua ne'e bele muda se ema balu rejeita kadeira.

Lista iha sorin loos hatudu sé de’it mak eleitu husi koligasaun AMP nian, ne’ebé hetan maioria, no lista iha sorin karuk hatudu kandidatu husi partidu opozisaun sira. Bele click iha lista sira atu bele haree klaru no moos liután.

Maluk sira bele mós download iha PDF lista kandidatu husi partidu polítiku sira ne’ebé sei tuur iha Parlamentu. Se kandidatu balu rejeita atu simu kadeira, sira seluk (ne’ebé iha naran marka ho kinur) sei muda ba leten hodi troka sira.

La’o Hamutuk simu ho ksolok Membru Parlamentu hotu ne’ebé foin eleitu, no ami hato’o parabéns ba sira. Ami espera buat di’ak de’it ba sira bainhira sira simu knaar hodi estabelese polítika no programa sira ne’ebé bele serbí povu timoroan tomak, liuliu sira ne’ebé presiza liu tulun.

Husi inísiu bainhira Timor-Leste hetan ukun rasik an, La’o Hamutuk enkoraja no suporta sira ne’ebé foti desizaun atu promove dezenvolvimentu ne’ebé sustentável no justu hodi atinje direitu umanu ho justisa. Timor-Leste sei hasoru dezafiu barak, no ami prontu ajuda Parlamentu foun ne’e atu haree no responde ba dezafiu hirak ne’e efetivamente.

No comments:

Post a Comment