Hafoin hadau malu no la ko’alia ho konstrutivu ba asuntu xave sira, Parlamentu aprova lei dahuluk (lia-portugés ka lia-inglés) husi mandatu foun lejizlativu nian. Nune’e sira autoriza transferénsia husi Fundu Petrolíferu hodi uza ba operasaun mákina governu to’o bele aprova Orsamentu Estadu tinan 2018 nian. Haree pájina web La’o Hamutuk nian hodi hetan informasaun tan.
Iha loron hanesan, Konsellu Ministru sira aprova Programa Governu ne’ebé fahe iha Parlamentu. Ami enkoraja Membru Parlamentu sira, sosiedade sivíl, sidadaun no observadór hotu atu lee no analiza dokumentu ne’e ho pájina 135, tanba programa no projetu sira ne’ebé hetan deskreve iha laran mak sei sai matadalan ba futuru Timor-Leste nian. La’o Hamutuk publika ona programa sira ne’e no bele hetan iha La’o Hamutuk nia pájina web ida-ne’e.
La’o Hamutuk espera katak diskusaun kona-ba programa ida-ne’e sei haree asuntu importante sira no sai konstrutivu liu kompara ho debate iha Parlamentu iha loron-sesta kotuk. Kuaze Timoroan hotu la’ós polítiku-na’in, maibé sira sidadaun baibain ne’ebé sei simu impaktu husi desizaun polítika, programa no asaun husi ofisiál sira-ne’ebé hetan fiar povu nian atu serbisu ba interese públiku. Programa Governu mak oportunidade atu ema hotu bele konsidera, diskute no deside ba dalan ne’ebé di’ak liu ba dezenvolvimentu ekitável no sustentável ba ita-nia nasaun tomak.
Hamutuk ita bele! Fiar an, la’o ba oin!
Posts
No comments:
Post a Comment