19 May 2011

LH fo treinamentu kona-ba Orsamentu Jeral Estadu

Iha fulan Marsu no Abril tinan 2011, La’o Hamutuk koopera hamutuk ho Fundasaun Mahein no Asosiasaun HAK, hodi halo treinamentu kona-ba Orsamentu Estadu 2011 durante loron tolu nia laran ba Sosiedade Sivil sira ne’ebe nia baze iha Dili no mos balun husi distritu sira hanesan Lautem no Oe-cusse.

Treinamentu ne’e foka liu ba seitor defeza no seguransa, seitor ne’ebe Fundasaun Mahein no Asosiasaun HAK tau-matan ba, maibe treinamentu ne’e mos inklui konseitu balun ne’ebe relevante ba Orsamentu Jeral Estadu nian hodi ajuda sosiedade sivil sira atu oinsa halo analiza. Ami tama aprezentasaun Powerpoint no dokumentu ruma husi treinamentu ida ne'e iha La'o Hamutuk nia website, atu fahe informasaun ba ema hotu. Ami mos iha planu atu fo treinamentu tan kona-ba asuntu importante ida ne'e.

Materia treinamentu nian kobre topiku sira hanesan:

1. Fundasaun
Inklui fundasaun legal, konseitu legal, gastus no reseitas ba orsamentu, Fundu Espesial no ezekusaun orsamentu.

2. Fontes Informasaun
Topiku ne’e atu ajuda partisipantes sira hodi bele asesu ba informasaun kona-ba alokasaun, gastus no reseitas OJE nian, no mos informasaun seluk ne’ebe sira presiza relasiona ho sira nia fokus area. Informasaun ne’ebe uza tenke mai husi dokumentus legal ka formal, bai-bain mai husi instituisaun estadu, hanesan website Ministeriu Finansas, Autoridade Nasional Petroleu, Autoridade Bankaria no Pagamentu (BPA), Jornal da Republika, no Portal Transparansia. Aleinde ne’e, iha mos informasaun sira ne’ebe mai husi organizasaun ne’ebe halo analiza, ezemplu website La’o Hamutuk, FMI, Banku Mundial, UNMIT no relatoriu Komisaun C Parlamentu Nasional. No mos bele uza informasaun sira ne’ebe mai husi media no politikus nain sira, maibe labele fiar lalais ba informasaun sira ne’e, presiza kompara didiak ho dokumentus legal, tamba dala ruma la konsistente ka reprezenta deit sira nia interese politiku.

3. Asuntu Importante 
Topiku ne’e koaliu liu asuntu sira ne’ebe iha relasaun ho kriasaun Fundu Infraestrutura, PEDN, ADN, ezekusaun orsamentu, gasta liu ESI (Fundu Petroleu), revizaun Lei Fundu Petroleu, osan restu (balansiu) husi tinan orsamental kotuk, portal transparansia, sustentabilidade ekonomia, imprestimu no debe.

Bele liga ba website La’o Hamutuk atu hetan material aprezentasaun no pajina web kona-ba Orsamentu Jeral Estadu 2011 nian.

No comments:

Post a Comment