22 January 2014

Fahe osan de’it


Rezultadu ida hosi diskusaun Parlamentár nian ne’ebé taka ba públiku mak aumenta tokon $64 ba “Transferénsia Públiku” iha orsamentu estadu 2014, ne’ebé sei hamenus transparénsia, kontabilidade no boa governasaun. La’o Hamutuk triste ba buat ida ne’e, no triste ba deputadu sira ne’ebé hakarak atu fahe de’it Timor-Leste nia rekursu petróleu ne’ebé limitadu ne’e ho la kuidadu.

Iha tinan balu foin daudauk ne’e, Timor-Leste gasta maizumenus 20% hosi nia orsamentu ba “Transferénsia Públiku” – pagamentu ba ema ka instituisaun sira ne’ebé labele kontrola ho kontratu, la liu tender ka la liu prosesu aprovizionamentu sira seluk no dala barak la husik surat tahan ida ba osan sira ne’e nia ain fatin. Parte boot hosi transferénsia ne’e mak hodi benefisia veteranu sira, maibé iha 2013 Timor-Leste transfere tokon $197 ba benefisiariu ho variedade ne’ebé luan liu. Ba 2014, Governu proposta tokon $292 iha transferénsia, no Parlamentu hasa’e ida ne’e ba tokon $336 hodi aumenta tokon $64 ba transferénsia foun hodi aumenta sa’e, montante ida ne’ebé hanesan ho orsamentu tomak Ministériu Saúde nian.

La’o Hamutuk koko atu foka sai ida ne’ebé boot tebes, maske dokumentu no alterasaun sira nee husik informasaun barak no ami bele la komprende se mak sei simu transferénsia ne’e.

Adesaun loloos iha transferénsia maka tokon $44, tanba Parlamentu hasai tiha tokon $20 ka lori hakat ba kategoria orsamentu sira seluk. Parte boot hosi redusaun 11 mak:
  • Tokon $10.5 (96%) hosi Diresaun Nasionál Terras no Propriedade iha Ministériu Justisa, ne’ebé muda ba despeza bens no servisu no la ko’a sai hosi orsamentu tomak
  • Tokon $5 (kua 96%) hosi Fundu Kontribuisaun ba Instituisaun Sosiál iha Todo Governu nia okos
  • Tokon $2.2 (kua 67%)  hosi Konstributoriu seguransa sosiál iha Ministériu Solidariedade Sosiál
Parlamentu aumenta ka hasa’e transferénsia iha liña orsamentál 17, ho total tokon $64. Sira ne’ebé boot liu mak:
  • Tokon $20 (foun) ba kapitalizasaun Banku Central Timor-Leste iha Todo Governu nia okos
  • Tokon $20 (4000% sa’e) ba Zona Ekonómiku Espesiál Oecusse, iha Ministériu Presidensia Konsellu Ministru nia okos
  • Tokon $5 (242% sa’e) ba Ajénsia Kooperasaun Timor-Leste iha Ministériu Negósiu Estranjeiru (hodi desmobiliza forsa armada sira iha Guinea-Bissau?)
  • Tokon $5 (200% sa’e) ba g7+ iha Todo Governu nia okos
  • Tokon $5 (67% sa’e) ba Kontribuisaun Finansial iha Todo Governu nia okos (atu selu ba FMI?)
  • Tokon $1 (foun) Diresaun Polítika no Dezenvolvimentu Jéneru iha Sekretáriu Estadu Promosaun Igualdade
  • Tokon $1 (28% sa’e) ba Diresaun Edukasaun Fíziku no Desportu iha Sekretáriu Estadu Juventude no Desportu (ba Federasaun Football Timor-Leste?)
  • Tokon $1 (foun) ba gabinete Ministra Solidariedade Sosiál
  • Tokon $1 (12% sa’e) ba Ministériu Petróleu no Rekursu Minerais (servisu auditoria ba Autoridade Nasionál Petróleu?)
  • Tokon $1 (20% sa’e) ba Komisaun Nasionál Eleisaun (hodi fó ba partidu polítiku sira?)
  • Tokon $1 (20% sa’e) ba pensaun vitalisia iha todo Governu nia okos
  • Tokon $0.8 (foun) ba Sekretária Estadu Fortalesimentu Institusional
Infelizmente, alokasaun hirak ne’e la inklui iha orsamentu ne’ebé detallu ne’ebé Governu propoin ba Parlamentu iha Outubru liu ba nia rohan, no Parlamentu halo prosesu “konsensu” ne’ebé lalais iha semana ne’e, ne’ebé la bele fó konsiderasaun ne’ebé sufisiente. Fasil tama, fasil sai.

No comments:

Post a Comment