Double digit lakon ona

Link to this article in English

Lider Timor-Leste sira dala barak orgullu katak Timor-Leste nia kreximentu GDP (Produto Internu Bruto ka PIB) naun mina-rai sa’e liu 10% kada tinan, lalais liu kompara ho inflasaun global – katak, iha “nivel double-digit.” Ezemplu mak, semana kotuk Primeiru Ministru ko’alia ba investidór potensiál sira iha Malázia katak “Dezde 2007, ami nia medida ba nivel kreximentu nian iha 11.9% no Banku Dezenvolvimentu Aziátiku (ADB) halo predisaun katak kreximentu nivel double digit sei kontinua ba futuru.”

Maski nune’e, Banku Mundial nia Pacific Economic Update (ba parte Timor-Leste), fó sai iha Tersa-feira foin lalais ne’e, hateten sai istória ida ne’ebé diferente, no mós  ADB nia Asian Development Outlook (ba parte Timor-Leste) ne’ebé publika semana kotuk, FMI nia relatóriu Article IV kona-ba Timor-Leste hosi Dezembru 2013, no Ministériu Finansas nia analiza fulan rua antes halo hanesan mos. Ne’e la’ós imajen ida ne’ebé optimistiku teb-tebes, maibé ida ne’e klaru no tenke sai input importante ba ukun-na’in sira. Hanesan iha tabela ida ne’e ne’ebé Banku Mundial hatudu sai, iha 2015 Timor-Leste sei sai nasaun ho kintu lugár iha rejiaun ne’ebé nia kreximentu GDP nian lalais liu. Outubru liu ba, Banku Mundial nia relatóriu tau Timor-Leste iha segundu lugár.


Bainhira Ministériu Finansas Timor-Leste halo proposta ba Orsamentu Jerál Estadu 2014 iha Outubru liu ba, sira redús sira nia estimasaun anterior ba kreximentu GDP nian iha 2012 hosi 10.6% ba 8.1%, no mós redús sira nia projesaun ba kreximentu iha 2013 hosi 10.6% ba 8.2%. Ba pasadu, ajénsia internasionál sira uza númeru Governu nian de’it, nune’e sira halo tuir de’it saida mak iha tiha ona.

Ministériu Finansas mós hatún projesaun ba kreximentu iha futuru. Ajénsia internasionál sira halo sira nia projesaun rasik, no sira hatún liu tan iha Governu nia projesaun nia okos. FMI no Banku Mundial daudauk ne’e halo predisaun katak kreximentu GDP naun mina-rai sei tun gradualmente, tun ba 7.7% iha 2015. Hafoin ne’e, sira hein katak Governu nia despeza atu sa’e, espesialmente despeza ba iha projetu infrastrutura sira, ne’ebé sei estimula tan kreximentu GDP ne’ebé lalais liu. Infelizmente, laiha ema ida mak antisipa ba kreximentu signifikante ba iha GDP produtivu nian (hanesan Agrikultura no maun de obra) ba maizumenus tinan balu oin mai.

Sura liu ba kreximentu GDP iha futuru sei fó kusta tokon dolar ne’ebé barak ba Timor-Leste. Outubru liu ba, konvite atu harii no halo operasaun ba Portu Tibar hateten ba konkorrente potensiál sira katak “Timor-Leste nia ekonomia sa’e maka’as no FMI nia predisaun real ba kreximentu GDP naun mina-rai maizumenus iha 10%, durante ba tinan lima oin mai.” Kompañia sira daudauk ne’e iha ona prosesu pre-selesaun nian, no konvite ba konkursu ba Parseria Públiku Privadu nian sei fó sai iha fulan ida ne’e nia laran. Karik trafiku portu nian muda tun no menus liu kompara ho ita ne’ebé ita ekspeta (revizaun foin lalais ne’e ba estimasaun GDP nian sei redús ida ne’e ba 16% ka liu), nune’e, Timor-Leste tenke kompensa hodi selu kompañia sira tanba sira  nia rendimentu tun.

Tabela tuir mai lista hela figura kreximentu GDP nian hosi fonte no dadus barak, ida ne’ebé foun liu iha lista primeiru

Estimatizasaun no projesaun sira ba kreximentu "real" GDP naun-mina Timor-Leste nian kada tinan
No.	Fonte	Data uza	2011	2012	2013 (est)	2014 (proj)	2015 (proj)	2016 (proj)
0	FMI World Economic Outlook	1/14 4/14	12.1%	9.3%	8.4%	9.1%	8.8%	9.9%
1	World Bank EAP Economic Update	4/14		8.3%	8.1%	8.0%	7.7%	8.6%
2	ADB Asian Development Outlook	4/14	12.1%	8.2%	8.0%	8.5%	8.5%
3	FMI Konsultasaun Artigu IV Consultation	12/13	12.0%	8.3%	8.1%	8.0%	7.7%	8.6%
3a	Total GDP (inklui mina) [3] FMI Konsultasaun Artigu	12/13	7.3%	5.7%	-3.2%	-6.9%
4	Orsamentu Jeral Estadu RDTL 2014	10/13 3/14	12.0%	8.2%	8.0%	8.8%
5	Hamburg Port Consulting (IFC) [2]	1/13 10/13	10.6%	10.9%	10.4%	9.9%	10.8%	11.5%
6	World Bank EAP EU	10/13	10.8%	10.6%	10.4%	10.2%	11.5%
7	ADB Asian Development Outlook	4/13	10.8%	10.6%	10.0%	10.0%
8	Orsamentu Jeral Estadu RDTL 2013	12/12 4/13	10.8%	10.6%	10.4%
9	FMI Konsultasaun Artigu IV	1/12	10.6%	10.0%	10.0%	10.0%	10.0%	10.0%
Notas: 1.     Kronolojia iha liña tabela nian ne’e muda, nune’e ida ne’ebé foun liu iha leten liu no tuan mak iha okos liu. Bainhira dadus rua mak fó sai ona, entaun hatudu katak sira fó sai dala ida tan. Lina tabela sira hosi 6-9 troka ona ho estudu sira ne’ebé foun liu. 2.     Lina tabela 5, bazeia ba projesaun tuan, projesaun ne’e sei uza atu halo planu ba portu foun ba kontainer iha Tibar. 3.    Anaunsérke liña tabela 3ª nian, hatudu figura tomak ba kreximentu real GDP naun mina-rai nee (halo ona korresaun ba inflasaun). Lina tabela 3ª mós inklui GDP hosi produsaun petróleu no gas, ne’ebé nia total liu 75% no hahú tun dezde 2012 tanba nia rezerva supa sai ona. GDP ne’e sei kontinua tun bainhira Bayu-Undan nia produsaun tun ba zero iha tinan neen oin mai.  4.    Liña 0 foin aumenta hafoin blogue ida ne’e publika tiha ona, tanba FMI foin publika sira nia dadus hafoin loron tuir mai.
Tabela ne’e kompila hosi Lao Hamutuk bazeia ba dokumentu sira ne’ebé refere ba. Abril 2014

GDP la’ós dalan di’ak ida atu sukat dezenvolvimentu ekonomia ne’ebé justu. GDP sura de’it osan, la’ós povu, tanba ne’e ema kiak sira ne’e la reprezenta hosi GDP. Iha tempu ne’ebé hanesan, ekonomia ida bele iha kreximentu GDP ne’ebé as, mai hamutuk ho númeru ema barak ne’ebé mak moris iha pobreza – klaru katak ida ne’e mak Timor-Leste nia situasaun dezde 2007. Aleinde ne’e, kreximentu populasaun ne’ebé sa’e lalais hamenus tiha GDP nia benefísiu ba kada ema ka ba kada família, no inflasaun nasionál sa’e maka’as liu tan kompara ho inflasaun global, hodi separa GDP “real” hosi kapasidade kompras ba ema sira ne’ebé kiak no ema sira hosi klase médiu.

Liu ¾ hosi GDP Timor-Leste nian mai hosi faan rezerva naun renovavel petróleu no gas, ne’ebé mós fornese maizumenus 93% Estadu nia rendimentu. Maski nune’e, GDP naun mina-rai ne’ebé diskute iha leten la inklui iha parte GDP ida ne’e, la hanesan ho estatístika iha rai seluk. Banku Mundial esplika katak GDP naun mina-rai mak “Timor-Leste nia preferénsia atu sukat atividade ekonómiku nian” tanba ida ne’e responsivu liu ba desizaun polítika nian duke petróleu, ne’ebé supa hosi kompañia rai li’ur sira no fan iha merkadu global. Timor-Leste nia rendimentu petróleu to ona nia másimu produsaun iha 2012 no sei tun iha dékada ida tuir mai, nune’e total kreximentu GDP nian sei negativu durante tempu sira hafoin mina-maran, hanesan hatudu iha liña 3ª iha tabela leten.

Problema seluk mak GDP naun mina-rai barak liu mak mai hosi gastu Estadu nian (hosi osan mina-rai nian). Faktu katak, sein konstrusaun, administrasaun públiku, parte boot hosi merkadorias no bens imobiliáriu sira hosi Governu, laiha kreximentu ba GDP naun min-rai. Setór produtivu sira – agrikultura no maun de obra – ne’ebé boot iha 2003 kompara ho 2011 (dadus ikus liu bele hetan iha ne’e), maski seidauk ajusta ho populasaun.

Loron hafoin ami publika artigu ida ne’e, FMI publika iha sira nia  World Economic Outlook ne’ebé atualiza, hodi halo estimatizasaun ne’ebé sa’e uitoan ba kreximentu GDP ba Timor-Leste kompara ho relatóriu seluk foin-daudauk ne’e, maibé nafatin iha 10% nia okos, hanesan hatudu iha Liña) iha tabela iha leten. Maske nune’e, FMI hateten sai katak figura sira ne’e mai hafoin halo tiha estimasaun ba tinan 2011 nian ( maske sira atualiza iha Janeiru 2014) no iha figura balu ne’e la konsistente ho dadus ne’ebé verifikavel liu.

Relatóriu hira mak sei halo atu lori ukun na’in no setór privadu sira iha Timor-Leste hodi fokus ba servisu sira ne’ebé todan no la glamour hanesan dezenvolvimentu agrikultura, indústria ki’ik, turizmu ne’ebé apropriadu, no prosesamentu ai han atu redús defisit merkadorias no kria ekonomia ida ne’ebé la depende ba despeza ida ne’ebe mai hosi rezerva petróleu? Ita laiha ona tempu barak.