Dili no Territóriu Timor-Leste: Presiza Avansa ho Planu Integradu no Inkluzivu

Inundasaun iha área besik edifísiu
Ministériu Finansa, 4 Abril 2021

Longer article in English / Artigu naruk liu iha Tetum
Programa radio (podcast)

Kuaze dékada rua liu ona, Dili no territóriu Timor-Leste la’o iha prosesu dezenvolvimentu nia laran. Maske nune’e, too ohin loron ita nafatin asiste katak sidade no territóriu tomak seidauk iha reziliénsia atu hasoru kualkér risku no perigu sira. Akontesimentu konkretu mak foin lalais ita hotu asiste ona kalamidade inundasaun boot ba dala rua dezde tinan kotuk, no foin lalais iha inísiu Abril 2021 ita nafatin hasoru inundasaun boot ne’ebé rezulta estragu barak ba infrastrutura públiku sira hanesan estrada, ponte, sistema eletrisidade, fasilidade saúde, eskola, estragu ba iha komunidade sira nia hela fatin no kuaze ema 44 mak tenke lakon sira nia vida. Ho esperiénsia sira liu ba bele sai ona hanesan motivasaun atu hatuur planu ida ne’ebé ho baze partisipativu, integradu no konsidera asuntu ambientál. Aleinde ne’e, importante mós atu hatuur povu nudár sentru ba desizaun hotu hodi konsidera no promove prinsípiu justisa, igualdade no inkluzaun.

Iha 29 Juñu 2021, liu husi serimónia Jornada Orsamentál 2022, Governu fó sai mós kona ba sira nia Planu Ordenamentu Territorial nudár sira nia prioridade xave no inisiativa espesífiku ba periodu 2022-2023 atu dezenvolve setór sira bazeia ba planu ordenamentu territorial inklui mós finaliza planu mestre iha sidade Dili. 

Saida mak sai kauza Dili no territóriu nafatin hasoru risku? 

Too ohin loron seidauk iha sistema planu no ordenamentu urbanu no rejionál ida ne’ebé bele hametin sidade reziliente liu ba dezastre sira no nia implikasaun mak ema barak harii uma iha fatin ne’ebé tama kategoria risku tuir sira nia hakarak tanba laiha opsaun seluk atu harii uma, nune’e fasil tebes atu hetan estragu no perigozu mós ba sira nia moris; (bele lee versaun artigu ne’ebé mai ho observasaun seluk tan ka rona program radio ho intervista ba hakerek nain.). 

Fatór seluk ne’ebé sai mós hanesan abut ba problema sira ne’e mak dezigualdade sosiál ekonomia ne’ebé obriga populasaun sira atu muda mai no konsentra hotu iha sidade. Sidade Dili sai sentru atrativu ba atividade hotu, empregu, atendimentu públiku sira, edukasaun iha nivel tersiáriu sira, saúde ho kondisaun di’ak liu kompara iha área rural, no mós sentru distribuisaun iha merkadu kuaze sentraliza iha Dili hodi rezulta taxa númeru populasaun iha kada tinan kontinua aumenta no susar atu kontrola. Razaun seluk Kapitál ida ne’e sai preferénsia mós atu buka moris tanba kampu servisu sira kuaze maioria iha Dili – Governu, organizasaun, ajénsia no negósiu sira maioria konsentra hotu iha Dili. 

Hatuur Planu No Ordenamentu Ne’ebé Integradu No Inkluzivu 

Tanba ne’e, Sidade Dili no territóriu Timor-Leste iha ona nesesidade atu avansa ho planu no dezenvolvimentu ida ne’ebé integradu, ekuitativu no inkluzivu mak ami hato’o rekomendasaun balu hanesan tuir mai ne’e.

Matéria Jornada Orsamentál 2022, Juñu 2021

Haktuir husi UN-Habitat 2014, fó sai hanoin balu kona-ba oinsá bele halo sidade ka área ida menus husi vulnerabilidade no menus husi perigu klimátiku, nune’e sira rekomenda katak importante mós atu iha adaptasaun ba kondisaun ne’ebé iha vulnerabilidade, liuliu kondisaun hela fatin, bele opta padraun sira atu konstrui uma ka infrastrutura sira ne’ebé bele prevene husi risku klimátiku sira. Nune’e, área hirak ne’ebé perigozu no fasil liu presiza iha bandu ba harii uma ka harii konstrusaun ruma bazeia ba nivel risku. Nune’e, di’ak tebes se bainhira utilizasaun ba rai no padraun atu harii uma ka konstrusaun ruma bele ajusta tuir área ida-idak, ezemplu hanesan iha sidade Dili, bele mós hatuur kontrolu no jestaun ba rai no bee atu identifika área hirak ne’ebé fasil liu ba bee sa’e, bele deside fatin balu atu sai hanesan área rezerva bee, aihoris, kultivasaun ka fatin desportu ruma ne’ebé bele absorve bee lihun no evita inundasaun.

Promove Prinsipiu Justisa, Igualdade no Inkluzividade ba iha área ka sidade ida

Halo planu tuir tendénsia ba mudansa sosiál, kulturál, ekonomia no konsidera oinsá ema hotu-hotu iha área ka sidade ida bele simu benefísiu. Signifika planu ka programa sira ne’ebé implementa presiza garante katak fó duni benefísiu ba populasaun hotu hodi haktuir ba polítika ne’ebé ho baze atu kompleta ema hotu nia nesesidade báziku sira hodi minimiza mós diskriminasaun iha sira nia moris loron-loron, liuliu sira ne’ebé mak vulneravel liu, hanesan ema ho defisiénsia, feto sira, labarik feto, ka sira ne’ebé ho nesesidade espesífiku inklui ema hirak ne’ebé idade ona, nune’e bele promove prinsípiu justisa no igualdade iha planeamentu hanesan tuir mai. 

Konsidera Populasaun Sai Sentru ba Desizaun

Governu hahú ona halo planu atu harii sistema drainajen iha sidade Dili, karik di’ak liu atu loke fali diskusaun públiku no fó oportunidade ba públiku atu hato’o hanoin sira antes atu konstrui ka dezeña fali bazeia ba kondisaun no desizaun populasaun nian atu nune’e la hasusar no haterus tan populasaun sira iha futuru hodi haktuir duni sira nia kondisaun moris. 

Razaun importante atu hadi’ak liu tan mekanizmu konsultasaun atu nune’e komunidade ka ba vítima afetadu sira bele intende no kompriende ho di’ak objetivu no materiais sira husi proponente projetu, atu bele rona barak liu komunidade afetadu sira nia preokupasaun, autoridade lokál, feto, ema ho defisiénsia sira, lia na’in, inklui sosiedade sivíl la’ós iha nasionál de’it maibé mós too nivel suku. Nune’e proponente bele konsiente liu no buka medida seguru ba vítima sira, atu la repete esperiénsia aat sira iha pasadu ne’ebé lori komunidade inklui feto no labarik, ferik katuas sira no ema ho defisiénsia hasoru situasaun ne’ebé la seguru no asisténsia ba kondisaun temporáriu no esperansa ne’ebé iha hela inserteza. 

Hakbiit Podér no Kapasidade Lokál 

Fó oportunidade ba rejiaun seluk atu hetan edukasaun ho kualidade, saúde ho kondisaun di’ak, asesibilidade ba bee moos no saneamentu, empregu, oportunidade ba iha kondisaun sósiu-ekonómiku ne’ebé estavel hodi atrai no aumenta sira nia vontade atu hela no dezenvolve rasik iha sira nia munisípiu. Iha parte seluk, presiza maximiza funsaun no kapasidade ba iha autoridade ida-idak iha kada munisípiu hodi bele enkoraja sira atu defini sira nia planu no determina tuir sira nia nesesidade iha area urbanu ka rural atu asegura katak area hotu bele iha kondisaun ekuitativu no tetu ba aspetu hotu tantu sosiál, kulturál, ekonomia no ambientál. 

Ita bele aprende husi pratika di’ak sira ne’ebé fó podér másimu ba autoridade lokál hanesan sidade São Paolo Brazil, no nasaun viziñu Indonézia. Iha kontextu Timor-Leste karik bele fó oportunidade ba podér lokál no nia komunidade sira rasik atu defini sira nia prioridade, liu-liu oinsá sira rasik bele halo planu tuir nesesidade urjénsia ne’ebé sira nia area presiza, tanba sira mak hatene kle’an liu sira nia difikuldade no dezafiu ne’ebé sira hasoru.

LH Husu MAP Atu Lori Lian Povu ba Simeira Mundiál Sistema Ai-han

Link to this blog in English  

Iha dia 14 de Jullu, La’o Hamutuk no NGO sira seluk entrega karta ba Ministru Agrikultura no Peskas kona ba Simeira Mundiál Sistema Ai-han (Food Systems Summit, FSS). Simeira ne’e iha objetivu atu fó dalan ba nasaun sira oinsá realiza Objetivu Dezenvolvimentu Sustentável (SDGs) no dezenvolve planu asaun atu hametin sistema ai-han. Ministru Agrikultura no Peskas sei partisipa iha Simeira refere inklui iha enkontru primeiru iha fulan Jullu nudár pre-simeira ida.

FSS se Promove Modelu Agrikultura ne'ebé Di’ak ba Povu ka Lae?

ONU servisu hamutuk ho Forum Ekonómiku Mundial (World Economic Forum, WEF) atu realiza Simeira Mundiál Sistema Ai-han. WEF hanesan organizasaun ida ne'ebé reprezenta interese liu husi 1000 kompañia boot. Iha Karta ba MAP, La’o Hamutuk observa katak organizasaun sosiedade sivíl barak iha mundu tomak haree katak konkordánsia entre ONU ho World Economic Forum (WEF) hodi realiza FSS ne’e sei loke dalan de’it ba kompañia boot sira atu partisipa direta no diskute sira nia interese iha prosesu governasaun ONU nian duke buka dalan no fasilita partisipasaun povu hodi hamosu solusaun ne'ebé efetivu no justu ba povu agrikultór ki’ik sira.

Sistema agrikultura konvensional ne'ebé kompañia boot promove buka atu industrializa agrikultura ho mákina, venenu kímiku (pestisida), no fini íbrida ka GMO (variedade ne’ebé nia jenétiku modifika ona), fini ne'ebé agrikultór ki’ik sira rasik labele habarak no tenke sosa ka depende ba kompañia multinational no komersiante boot sira. 

Sistema hirak ne’e sei aumenta liu tan problema hamlaha no seguransa ai-han iha mundu tomak no sei hatodan liu tan agrikultór ki’ik sira nia moris tanba kontinua hasa’e kustu produsaun ai-han nian. Problema degradasaun ba rai, bee no meiu-ambiente kontinua aumenta, no produsaun agrikultura sai vulneravel liu tan. Estudu barak hatudu katak, dezenvolvimentu agrikultura iha nivel industrial ne’ebé domina husi kompañia multinasionál no transnasionál sira la fó kontribuisaun boot ba hamenus kiak no hamenus in-seguransa ai-han no malnutrisaun, no bele estraga bee no ambiente no fó risku ba saúde.

Modelu agrikultura familiar no agro-ekolojia mak konserva diversidade iha produsaun, no sai fundasaun forte ba diversifikasaun produsaun ai-han. Sistema produsaun diversifikadu di’ak liu ba rai, ambiente no iha vulnerabilidade ki’ik liu ba mudansa klimátika. Tuir mai Organizasaun Ai-Han Mundiál (Food and Agriculture Organization, FAO) rekoñese ona importánsia husi modelu ne’e hodi dedika dékada ida ne’e (2018-2028) nudár dékada ba agrikultura familiar.  Tuir FAO agrikultura familiar sei sai xave importante tebes hodi atinje agenda Objetivu Dezenvolvimentu Sustentável 2030 nian ne’ebé Timor-Leste mós adopta hela. Agrikultura familiar la kontra modernizasaun maibé foka liu ba adaptasaun teknolojia no inovasaun foun ne’ebé mak efetivu no sustentável liu, ne'ebé adapta ba matenek no rekursu lokál sira.

Presiza Hametin Knaar Povu Nian iha Governasaun Sistema Ai-Han

Enkontru FSS iha planu mós atu kria organizasaun sientífiku foun iha sistema ONU nian ho naran Science-Policy Interface (SPI). Objetivu SPI atu ajuda prosesu governasaun liu husi fasilita peskiza no analiza husi peritu no matenek na’in sira. Nudár ezemplu ida mak organizasaun IPCC ne'ebé sai hanesan SPI ba asuntu mudansa klimátika. 

Tuir loloos, ONU nia Komité ba Seguransa Ai-Han (Committee for Food Security - CFS) kria ona SPI ida, ho naran High Level Panel of Experts on Food Security and Nutrition (HLPE). Komité ida ne’e eziste ona dezde tinan 2010, no konsege fasilita partisipasaun sosiedade sivíl no grupu indíjena sira iha sira nia atividade.  Infelizmente, objetivu husi FSS atu hamenus knaar HLPE no troka ho SPI foun ne'ebé sei menus akontabilidade tanba kompostu husi setór privadu no sientista sira, no ladún loke ba partisipasaun sosiedade sivíl.

Ligadu ho preokupasaun atu hamosu SPI foun hodi troka HLPE, Panel Internasionál no Matenek Nain ba Sistema Ai-Han Sustentável (International Panel of Experts on Sustainable Food Systems - IPES-Food) hakerek briefing paper ida ne'ebé hatudu sira nia preokupasaun ho proposta atu kria SPI foun; sira preokupa katak SPI foun sei la rekoñese povu no toos-na’in nudár matenek na’in, no bele promove solusaun tékniku ne'ebé ignora komplexidade relasaun sosiál, ekonomia no ambientál. Ami konkorda katak solusaun ne'ebé efetivu no justu presiza involve maka’as partisipasaun agrikultór ki’ik sira no populasaun ho skill menus.

Mensajen Saida Mak MAP Presiza Lori ba FSS?

La’o Hamutuk fiar katak povu Timor-Leste iha perspetiva no koñesimentu relevante no importante ba simeira mundiál FSS, ne'ebé Ministru ho ekipa sei partisipa no bele lori ba Forum ida ne’e. Iha karta, La’o Hamutuk hato’o rekomendasaun tuir mai ba Ministru Agrikultura no Peskas:

• Ami husu MAP atu lori lian povu Timor-Leste nian ba UN FSS, no kestiona knaar World Economic Forum (WEF) iha Food System Summit ne'ebé limita povu nia partisipasaun, no tanba sá?

• Timor-Leste bele fahe ita nia esperiénsia ho agrikultura familiar no sistema agrikultura sustentável, agro-ecology no produsaun orgánika atu enkoraja partisipante iha FSS atu promove solusaun sustentável hirak ne’e.
  
  
• Uza oportunidade FSS atu loke diskusaun kona ba knaar sosiedade sivíl no grupu toos-na’in iha governasaun ONU, no promove akontabilidade no inkluzaun iha prosesu refere.
  
  
• Rejeita proposta atu kria SPI hodi troka HLPE ho SPI foun ne'ebé la inklui mekanizmu forte atu fasilita partisipasaun povu.
  
  
• Fahe Timor-Leste nia esperiénsia ho mudansa klimátika atu hatudu importánsia atu hamenus emisaun gas estufa, halo adaptasaun apropriadu, no responde bainhira hasoru ameasa hirak ne’e.
  
  
• Atu kontinua realiza prinsípiu demokrátiku no sustentabilidade iha rai laran liu husi promove no hametin agrikultura familiar, konservasaun ba bee, governasaun populár no foo prioridade ba seguransa ai-han ho prinsipiu soberania ai-han inklui nutrisaun di’ak ba povu.
  

LH Asks the Ministry of Agriculture to Bring the Voice of the People to the Food Systems Summit

Liga ba artigu ida ne'e iha lian Tetum

On 14 July, La’o Hamutuk and other NGOs sent a letter to the Ministry of Agriculture and Fisheries regarding the upcoming Food Systems Summit (FSS). The objective of the Summit is to establish a path toward realizing the Sustainable Development Goals (SDGs), and to create an action plan and measurable goals to strengthen food systems. Timor-Leste’s Ministry of Agriculture and Fisheries will participate in the Summit, including a pre-summit this month.

Will the FSS promote agricultural approaches that are good for people?

The UN signed an agreement with the World Economic Forum (WEF) to jointly realize the Food Systems Summit. The WEF represents the interests of more than 1000 global corporations. In our letter to the Ministry, we pointed out that many in civil society view this agreement as opening the door to major private sector actors to participate directly in UN governance processes, while excluding civil society and agricultural movements from helping to develop effective and just solutions. For this reason, many civil society organisations believe that that FSS will not come up with solutions which are appropriate or just for farmers.

Large corporations promote conventional agriculture, seeking to industrialize production through the use of machinery, pesticides, and hybrid or genetically modified seeds that small-scale farmers must repeatedly purchase from the companies who have the rights over the genetic material. 

This system can exacerbate hunger and food insecurity, and can burden small-scale farmers. Studies have shown that industrial agriculture, and agriculture built on biotechnology, does not help eradicate poverty or food insecurity, and can threaten water, the environment, and human health.

Family farming and agro-ecology are models that can conserve diversity of production, and serve as a strong foundation for further diversification. Diverse agricultural production is good for the soil and for the broader environment, and is more resilient to climate change. The UN Food and Agriculture Organization (FAO) recognizes the importance of family farming, and had declared 2019-2028 as the Decade of Family Farming.  The FAO recognizes that family farming is key to achieving the SDGs, to which Timor-Leste is committed. Family farming isn’t contrary to modernization, but it focuses on technological innovations that are effective, sustainable and adapted for local knowledges and resources.

We need to strengthen people’s voices in food systems governance.

The FSS also plans to create a new Science-Policy Interface organization (SPI). SPIs, such as the Intergovernmental Panel on Climate Change (IPCC), assist governance processes by facilitating research and analysis. 

Through the UN’s Committee on World Food Security (CFS), there is already an SPI addressing food systems: the High Level Panel of Experts on Food Security and Nutrition (HLPE). This Committee was established in 2010, and since then has provided reports and research on food security, nutrition, and related topics to the Committee for Food Security. Unfortunately the FSS will probably reduce the role of the HLPE and replace it with a new SPI, which will reduce accountability because it will likely be comprised of scientists and private sector actors, and will be less open to civil society participation.

The International Panel of Experts on Sustainable Food Systems (IPES-Food) has published a briefing note about shifting the HLPE mandate to a new SPI; they are concerned that the new body may fail to recognize local communities and farmers as bearers of knowledge, while promoting technical solutions that overlook social, economic, and environmental relationships. We agree that an effective and just approach to food systems must involve high levels of participation from farmers, and the “unskilled” population.

What should the Ministry’s message to the FSS be?

For this reason, we believe that the people of Timor-Leste have a relevant and important perspective on the FSS which the Ministry, as a participant in the Summit, should give voice to.
In our letter, La’o Hamutuk made the following recommendations to the Ministry:

• Bring the voice of the people to the FSS, and raise concerns about the role of the World Economic Forum and the limited role of communities. 
  
  
• Share Timor-Leste’s experiences of family farming, sustainable and organic agriculture, and agro-ecology, and encourage participants in the FSS to promote these approaches.
  
  
• Use the FSS as an opportunity to open a conversation about the role of civil society and farmers in UN governance, and promote greater accountability and inclusion in these processes.
  
  
• Reject calls to create new Science-Policy Interface that would fail to include strong participation mechanisms, to replace the HLPE.
  
  
• Share Timor-Leste’s experience of the impacts of climate change, to demonstrate the importance of responding to this threat by reducing greenhouse gas emissions and making appropriate adaptations.
  
  
• Continue to realize democratic values and sustainability within Timor-Leste, by promoting and strengthening family farming, water conservation, popular governance and prioritizing the achievement of food security through food sovereignty, including quality nutrition for all.

Kaptura no rai hela karbonu iha Timor-Leste nia Tasi Okos:

Solusaun ba Mudansa Klimátika ka Kolonializmu Karbonu?

Link to this blog in English

Iha fulan Maiu, Santos no Eni, parseiru rua iha Konsorsiu Bayu-Undan, konkorda atu buka oportunidade hodi kontinua atividade iha kampu Bayu Undan, hafoin bainhira posu sira maran iha tinan 2022 ka 2023. Sira hanoin atu uza kampu ida ne’e atu kaptura no rai hela karbonu (iha lian Ingles, Carbon Capture and Storage ka CCS). Ne’e katak gas karbonu dioxida ne’ebé sai ona hanesan emisaun ka lixu husi produsaun gas naturál sei hatama iha tasi okos iha tasi Timor-Leste nian. Proposta ida ne’e bele sai perigozu ba Timor-Leste, no sei la ajuda maka’as ba esforsu atu hamenus mudansa klimátika.

Tanba sá mak Kaptura no Rai Hela Karbonu

Mundu tomak hasoru hela problema mudansa klimátika hanesan rezultadu husi atividade umanu nian, inklui produsaun mina no gas. Kompañia sira ne’ebé kria emisaun gas estufa hetan presaun atu hamenus sira nia impaktu ba ambiente. Maibé, haree ba sira nia lukru, kompañia mina no gas sira lakohi atu hapara produsaun. Sira buka meius atu prolonga produsaun, no sistema kaptura no rai hela karbonu fó posibilidade atu kontinua estraga ambiente, maibé evite no husik sira nia responsabilidade.

Bainhira Santos no Eni fó sai katak sira buka oportunidade atu estabelese sistema kaptura no rai hela karbonu, sira la esplika ho klaru sira nia motivasaun ka planu espesífiku. Maibé ita bele haree katak sistema kaptura no rai hela karbonu bele ajuda sira atu hasa’e sira nia lukru ba oin no prolonga produsaun.

Kompañia Santos hasoru hela problema boot ida, tanba kampu Barossa ne’ebé sira jere, sei hamosu montante karbonu dioxida ne’ebé aas tebes. Gas naturál iha kampu Barossa kahur ho nivel karbonu dioxida aas liu. Hanesan ho kampu Evans Shoal ne’ebé kompañia Eni jere. Kampu rua ne’e tama iha tasi Australia nian.

Kompañia rua ne’e simu presaun atu hamenus sira nia impaktu negativu ba ambiente. Tuir Akordu Paris nian, maioria nasaun sira iha kometimentu atu hamenus sira nia emisaun gas estufa. Santos promete atu atinje emisaun net zero iha tinan 2040, no Eni promete atu atinje tarjetu hanesan iha 2030. Net zero signifika katak sira sei kalkula emisaun no foti asaun hanesan rai karbonu ka kuda ai atu hamenus karbonu iha atmosfera ho montante hanesan ho sira nia emisaun. Net zero la’ós katak sira sei hamenus produsaun gas estufa.

Ho nune’e, uza Kampu Bayu Undan nudár fatin atu implementa sistema kaptura no rai hela karbonu, kompañia Santos no Eni bele halo nia aan hanesan di’ak ba ambiente, no prolonga produsaun gas natureza. Santos mós bele adia kustu desmantelamentu projetu Bayu-Undan, liu husi prolonga atividade iha ne’ebá.

Solusaun bele di’ak ba kompañia sira nia lukru, maibé ladún di’ak ba Timor-Leste no ba klima global.

Prosesu Rai Karbonu Efetivu ka Lae?

Projetu Rai Karbonu boot liu iha mundu, iha Australia nia tasi, sai parte husi kompañia Chevron nia projetu Gorgon LNG. Hafoin komesa produsaun iha tinan 2019, Chevron hasoru problema ho teknolojia rai karbonu, no konsege rai 30% de’it husi karbonu ne’ebé sira promete atu rai. Maibé, sira kontinua nafatin produsaun gas iha kampu Gorgon no kauza emisaun karbonu boot.

Se bainhira kompañia konsege implementa sistema kaptura no rai hela karbonu ho di’ak, ne’e mós sei la rezolve problema, tanba sira nia produtu final, gas naturál, mós kontribui ba mudansa klimátika. Gas naturál kompostu husi gas metanu, ne’ebé fó impaktu negativu boot ba temperatura mundu nian, prosesu atu transporte, no uza gas naturál kria emisaun gas karbonu dioxida. Imposivel atu muda produsaun gas naturál hodi sai di’ak ba ambiente.

Realidade, indústria mina no gas promove sistema kaptura no rai hela karbonu hanesan solusaun falsu ka bosok, ne’ebé fó oportunidade ba kompañia sira atu la’o nafatin. Medidas ne’ebé efetivu liu atu rezolve problema mudansa klimátika mak hamenus produsaun gas estufa hotu no investe iha enerjia renovável. Habosok nasaun hanesan Timor-Leste hodi simu solusaun falsu hanesan sistema kaptura no rai hela karbonu sai obstákulu ba asaun efetivu liu.

Risku no Responsabilidade

Rai karbonu iha Timor-Leste nia tasi okos bele hamosu risku. Ladún klaru se mak sei responsabiliza fasilidade tasi nian ba futuru, atu asegura katak karbonu dioxida la suli sai. Se karbonu dioxida suli sai no tama iha tasi, bele kauza ásidu tasi nian atu aumenta ho impaktu negativu ba ekosistema. Karbonu ne’ebé sira propoin atu rai sei presiza jere durante longu prazu, bele to’o tinan rihun ba rihun. Tinan rihun ida ba oin, kompañia sira sei eziste nafatin? Se mak sei responsabiliza karbonu dioxida?

Maske Santos sujere katak sei iha remunerasaun ba Timor-Leste, seidauk klaru osan hira mak kompañia sei selu. Bazeia ba ami nia estimasaun, rendimentu ba Timor-Leste karik bele to’o tokon $40 kada tinan, maizumenus 2% husi OJE tomak. Ita presiza tetu didi’ak benefísiu husi rendimentu kompara ho risku no responsabilidade sira ne’ebé ita sei hasoru.

Justisa Klimátika no Kolonializmu Karbonu

Timor-Leste nia rekursu naturais, inklui biodiversidade no ekosistema iha tasi, la bele sakrifika hodi kompañia kontinua goza liu hosi atividade mina no gas atu bele hetan lukru tan. Ideia atu uza Timor-Leste nia tasi nudár fatin lixu (fatin atu rai sira nia emisaun), hodi sira bele kontinua hetan lukru boot, ne’e kontra prinsípiu justisa klimátika no bele hamosu “kolonializmu karbonu.” Organizasaun ativista balu uza fraze "kolonializmu karbonu" atu deskreve projetu sira ne’ebé promete atu ‘hamenus’ impaktu husi emisaun sira ho projetu ne’ebé bele hamosu esplorasaun ba nasaun sira ne’ebé seidauk dezenvolvidu, hanesan iha tempu koloniál. Santos nia fo’er la’ós Timor-Leste nia responsabilidade.

Buka no kontribui ba solusaun ba mudansa klimátika importante ba nasaun hotu, no ita presiza halo esforsu hamutuk atu rezolve. Artigu ida ne’e la sujere katak Timor-Leste la bele sai parte husi solusaun ba mudansa klimátika. Problema mak sistema kaptura no rai hela karbonu la’ós solusaun ba mudansa klimátika, no bele fó risku boot ba Timor-Leste. Mudansa klimátika bele halo mudansa ba udan (la mai tuir tempu), no bele hamosu inundasaun, no tempu maran bele mós dura ba tempu kleur. Impaktu ida tan mak tasi sai aumenta aas liu; ne’e sei fó impaktu negativu ba disponibilidade bee mós, no fó ameasa ba komunidade ne’ebé hela besik iha tasi ibun. Timor-Leste sai vulneravel liu ba impaktu hirak ne’e, tanba ita nia infrastrutura báziku ladún forte, no povu barak mak depende ba setór agrikultura.

Atu realiza projetu ida ne’e, kompañia sira presiza hetan konkordánsia husi autoridade Timor-Leste nian. La’o Hamutuk sei kontinua atu tau matan ba asuntu ida ne’e, hodi asegura katak Timor-Leste liuliu nia povu maubere labele sai vítima tan ba kompañia sira nia mehi ba lukru boot liu hosi esplorasaun rekursu naturais.

--------------

Atualiza: Iha loron 13 Setembru 2021, Santos no ANPM asina MOU hodi halo progresu ba CCS iha Bayu-Undan.
Iha fulan Outubru, La'o Hamutuk fo aprezentasaun ida (mos PDF) kona-ba CCS ba webinar ida kona-ba mudansa klimatika.

Sentidu kondolénsias família no maluk tomak ne’ebé lakon Belun Boot Saudoza Carmel Budiardjo

English follows below

Laran triste no todan tebes rona katak belun boot Povu Timor nian, Mana Carmel Budiardjo liu ona ba mundu seluk. La’o Hamutuk espresa sentimentu triste boot ba Mana Carmel Budiardjo nian mate. Mana Carmel povu Timor nian amiga boot ida, no maluk solidariedade internasionál sira seluk. 

Mana Carmel hamriik metin iha povu Timor-Leste nian sorin iha tempu difisil, durante okupasaun ilegál militár Indonézia nian iha Timor-Leste. Dezde 1975, nia apoiu Timor-Leste nia soberania, no hakerek livru importante tebes iha 1984: The War Against East Timor, ne’ebé loke ema barak nia matan iha mundu tomak. Nia kria organizasaun TAPOL iha Inglaterra iha tinan 1973, no NGO ida ne’e nafatin luta kontra violasaun direitu umanu no soberania iha Papua Barat no Indonézia rasik.

Hafoin husi rejime kruél okupante militár Indonézia uluk nian ho apoiu luta hamutuk entre povu Timor no maluk solidariedade, Timor-Leste ohin sai nasaun ida la ho prezensa rejime ditadura rai li’ur nian. Ami sente kontente iha maluk hanesan saudoza mana Carmel Budiardjo no kolega solidariedade sira seluk, mana Carmel nian maluk barak mak oras ne’e kontinua tau matan ba Timor no luta kontinua ba liberdade no direitus umanus iha rai sira ne’ebé sei iha hela okupasaun no rejime ditadura.

Mana Carmel sedu atu rekoñese ligasaun entre direitu umanu no ambiente, no partisipa iha kriasaun rede balun atu avansa kampaña sira ne’e.  Nia mós fó inspirasaun no motivasaun ba ativista barak iha mundu tomak, inklui ETAN iha EUA, no lori ema barak atu apoiu povu Timor-Leste, Papua no Indonézia.

Ami hanoin katak Povu Timor labele haluha lalais ita nian belun Solidariedade sira namkari iha mundu rai klaran ne’ebé sempre hamriik iha ita nian sorin durante situasaun todan oin-oin. Ami sujere mós atu uza naran saudoza ne’e nian iha obra balun hodi husik hela memória husi jerasaun ba jerasaun Timor-Leste nian. 

Iha 2009, Governu Timor-Leste rekoñese mana Carmel nia kontribuisaun ho medalla, no nia mai Dili atu partisipa iha Konferénsia Solidariedade ne’ebé marka tinan sanulu hafoin konsulta popular. Ami orgullu atu organiza eventu ida ne’e, no bele lee mana Carmel nia diskursu iha ne'e.

With Jose Ramos-Horta and Charles Scheiner

Semana ida ne’e, hafoin mana Carmel sai husi mundu real, ukun na’in sira no ema barak apresia ninia kontribuisaun ba rai doben Timor-Leste. Karik mana Carmel bele ko’alia, ami iha serteza katak nia ezije ita hotu atu kontinua luta ba justisa no demokrasia. Dalan ne’e apropriadu liu atu fó respeita ba lider boot ida ne’e.

Obrigadu barak saudoza Carmel Budiardjo no maluk solidariedade internasionál sira seluk.

As lutas kontinuam.

Condolences to family and comrades who lost a great friend in Carmel Budiardjo

With James Dunn, Australia

With heavy hearts, we learned that a great friend of Timor-Leste, mana Carmel Budiardjo, has left for another world. La'o Hamutuk is deeply saddened by Carmel's death. She was a huge supporter of the Timorese people and of other friends in the international solidarity movement.

Carmel stood alongside the people of Timor-Leste during difficult times, under the illegal Indonesian military occupation. Ever since 1975, she supported Timor-Leste's sovereignty, and in 1984 she wrote an important book -- The War Against East Timor -- which opened people's eyes all over the world. In 1973, she created the organization TAPOL in the UK, and this NGO continues to campaign against human rights violations and for sovereignty in West Papua and Indonesia proper.

Now that the brutal Indonesian military has left Timor-Leste, thanks to the common struggle of Timorese people and solidarity friends, Timor-Leste today is a nation free of foreign dictatorship. We are gratified that our supporters, including the departed Carmel Budiardjo and many other solidarity colleagues, continue to keep an eye on Timor-Leste and to struggle for freedom and human rights.

Mana Carmel was early to recognize the connections between human rights and the environment, and helped create several networks to advance this campaign. She also inspired and motivated activists around the globe, including ETAN in the USA, and brought many people into movements supporting the people of Timor-Leste, West Papua and Indonesia.

With Tom Hyland, Ireland

We believe that the Timorese people must not forget our friends in solidarity from across the world, who always stood by our side during heavy times. We suggest to name some public works after Carmel Budiardjo, so that her memory will persist for future Timorese generations.

In 2009, the Government of Timor-Leste recognized Carmel's contributions with a medal, and she came to Dili to participate in the Solidarity Conference to commemorate the tenth anniversary of the referendum. We are proud to have helped organize that event, and you can read Carmel's speech here.

With Saskia Kouwenberg, Netherlands

This week, after Carmel departed this world, Timorese government officials and many others have appreciated her contributions to this beloved land. If Carmel could speak, we are certain that she would tell all of us to continue the fight for justice and democracy. That is the most appropriate way to honor her legacy.

With tremendous gratitude to Carmel Budiardjo and other international solidarity friends.

The struggles continue.