Direitu atu Partisipa iha Eleisaun Livre husi Diskriminasaun
Konstituisaun RDTL Artigu 7 hatete katak “Povu ejerse podér polítiku ho sufrájiu universál, livre, iguál, direta, sekretu.” Artigu 21 hosi Deklarasaun Universal Direitus Umanus no Artigu 25 hosi Konvensaun Internasionál ba Direitu Sivíl no Polítika hatutan katak Estadu iha obrigasaun atu organiza eleisaun ida ne’ebé genuine (loloos). Sidadaun hotu-hotu sein diskriminasaun iha direitu atu partisipa ho livre no ejerse sira nia direitu ba vota hodi hili sira-nia lider. Ne’e signifika katak iha prosesu eleisaun, la bele iha restrisaun diskriminatória inklui diskriminasaun bazeia ba seksu, lian, polítiku, relijiaun, no defisiénsia.
Esforsu atu elimina diskriminasaun seidauk konsege hamosu igualdade iha nasaun laran. Ita hotu presiza tau matan nafatin ba asuntu importante ida ne’e. Ligadu ho eleisaun prezidensiál periodu 2022-2027, Lao Hamutuk hakarak fahe hanoin no esperansa maluk defisiénsia sira, husi organizasaun feto iha Timor-Leste, husi grupu alumni parlamentu foin-sa’e Timor-Leste.
Eleitor nia Lian no Esperansa
Eleisaun Asesivel ona ka Lae ba Ema ho Defisiénsia iha Timor-Leste?
Tuir mai Sr. Joao Zito dos Santos, diretór Rae’s Hadomi Timor Oan (RHTO) reprezentante maluk defisiénsia sira iha Timor-Leste hato’o sira nia hanoin no esperansa liga ho eleisaun ba prezidente repúblika periodu 2022-2027:
Ami nia hanoin kandidatu se de’it mak povu hili importante mak sai matan, tilun, ibun ba povu kbiit laek sira no oinsá buka hatene ema hirak ne'e nia kondisaun inklui ema defisiénsia sira, atu oinsá partisipa iha desizaun sira liga inkluzaun sosiál, asesibilidade ba dezenvolvimentu nasaun nian.
Ita hotu hatene katak agora iha kandidatu hamutuk 16, númeru boot hanesan ne'e, nudár dezafiu ida ba ema defisiénsia sira, tanba liga ho buletin de votu la iha asesibilidade ba maluk defisiénsia sira, liu-liu defisiénsia matan iha Timor-Leste. Iha eleisaun tinan lima liu ba, maluk defisiénsia sira hatoos ona relatóriu no rekomendasaun sira liga ho ejijénsia no preokupasaun ema defisiénsia nian ba Komisaun Nasionál Eleisaun (CNE) no Sekretáriu Téknika Administrasaun Eleitorál (STAE) atu konsidera oinsá eleisaun tuir mai bele iha kondisaun ruma hodi prodús mós bulletin de votu ho asesibilidade ba maluk defisiénsia matan sira, atu nune’e sira bele partisipa ho didi’ak iha eleisaun. Maske ami hato’o ona ejijénsia maibé la iha resposta no mudansa ba bulletin de votu, karik eleisaun agora mós nafatin la asesivel ba ema defisiénsia matan sira. Maske na’i ulun sira ko’alia barak kona ba inkluzaun no igualdade, maibé nudár retórika de’it no la tau iha asaun no implementasaun.
Tanba ne'e, ami defisiénsia sira kontinua sai marjinalizadu iha estadu nia matan. Tuir lei inan garante katak ema hotu iha direitu hanesan. Tuir Konstituisaun Artigu 16 hakerek klaru kona ba Universalidade no Igualdade, maibé iha pratika, lei oan sira hanesan lei ba eleisaun nian la hare didi’ak ba prinsipiu jerál ne’ebé hakerek klaru iha konstituisaun. Situasaun ne'e nudár preokupasaun boot tebes ba ema defisiénsia sira.
Partisipasaun no Direitu Feto
Husi perspetiva jéneru, Diretóra Fokupers Sra. Maria Fatima Pereira Guterres (mana Fati) hato’o mós preokupasaun ida katak, prosesu eleisaun ladún sensivel no responsive ba asuntu jéneru ho mós inkluzaun nee rasik:
Ami preokupa tanba dala ruma situasaun emerjénsia mosu hanesan kazu violénsia sira ita la espera maibé sempre akontese no vítima sira tenke hetan protesaun husi uma mahon sira. Ligadu ho sistema eleisaun nian, ami hare la sensivel no responsive hodi fasilita vítima sira ba vota. Tuir regulamentu formal katak, ema hotu ba vota tenke iha kartaun eleitorál ka dokumentu ofisiál ruma, no vítima barak ho kazu violénsia bazeia ba jéneru halai sai husi uma la hodi dokumentu hirak nee, no la iha sistema di’ak atu fasilita, entaun sira lakon direitu ba vota.
Diretóra haktuir katak, hala’o ona esforsu barak maibé seidauk iha mudansa hodi fasilita vítima no maluk kbiit laek sira iha eleisaun.
Perspetiva husi Joven
Tuir joven feto Celina Soares Franklin nudár membru ba organizasaun alumni parlamentu foin-sa’e Timor-Leste:
Kampaña eleisaun prezidensiál tinan ne'e kompetitivu tebes tanba iha kandidatu feto na’in 4 husi kandidatu na’in 16 ne’ebé kompete iha eleisaun periodu tinan ne’e. Ho kandidatu feto sira, hatudu katak iha mudansa pozitivu liga ho luta ba igualdade jéneru nian no garantia katak feto partisipa ativu iha vida polítika, ekonomia, sosiál no kulturál.
Espera katak kampaña tinan nee lider sira labele insultu malu, maibé tenke hato’o sira nia programa no estratéjia sira ba dezenvolvimentu nasaun nian, oinsá ema hotu tenke kria situasaun amigavel no hakmatek hodi hametin pas no estabilidade. Nudár joven no estudante, husu ba kandidatu se-se de’it mak sei eleitu ba Prezidente Repúblika, tenke ejerse ita boot sira nia knaar tuir konstituisaun RDTL, halo ligasaun, diálogu no komunikasaun di’ak ho órgaun soberania sira seluk atu garantia moris hakmatek, justu no pás.
Konkluzaun
Povu Timor-Leste bele orgullu katak durante periodu independénsia, Timor-Leste konsege realiza ona eleisaun ne’ebé demokrátiku, dame, no livre husi violénsia. Kometimentu povu ba prinsipiu demokrátiku no pas sai forte nafatin. Maske nune’e ita presiza halo nafatin esforsu atu asegura katak ema hotu bele realiza sira nia direitu demokrátiku livre husi diskriminasaun.
Hanesan ho eleisaun uluk, staff La’o Hamutuk sei partisipa iha eleisaun, no hola parte mós nudár observadór. Knaar observadór mak atu monitoriza prosesu eleisaun, atu identifika forsa no frakeza sira iha prosesu, inklui identifika dezafiu ne’ebé eleitor defisiénsia no eleitor feto sira hasoru. Ami sei fornese rezultadu husi ami nia monitorizasaun ba autoridade relevante hodi bele kontinua nafatin hadi’ak, hametin prosesu demokrátiku iha Timor-Leste. Mai ita hotu suporta malu atu realiza eleisaun demokrátiku ho inkluzivu liu! Viva povu Timor-Leste!
Posts
No comments:
Post a Comment