Hafalun fatuk ho osan mean

Faktus mak faktus nafatin, maske relasaun públiku konta buat seluk

Link to this blog in English

Fulan kotuk, Governu Timor-Leste halo komunikadu imprensa ida ‘Reforma sira komesa hatudu rezultadu iha panorama ekonómiku ne’ebé pozitivu ba Timor-Leste’  no publika artigu seluk ne’ebé fahe mensajen hanesan Timor-Leste tama ba eleisaun 2017 ho konfiansa.

Artigu hirak ne’e, ne’ebé uza informasaun husi Governu, Banku Mundial, no FMI, fó perspetiva pozitivu tebes ba futuru ekonomia Timor-Leste nian. Infelizmente, bainhira uza kotasaun ne’ebé sees husi kontextu no ignora tiha realidade prinsipál sira, sira pinta – hanesan Salvador Dali – imajen surrealista ida ne’ebé diferente tebes husi realidade ne’ebé Timor-Leste enfrenta oras ne’e daudaun, enkuantu ita nia reseita petrolíferu besik hotu ona, ita nia investimentu sira fó fila retornu ne’ebé limitadu, no planu despeza estadu nian bele hamohu ita nia osan ne’ebé rai hela iha Fundu Petrolíferu iha tinan 10-12 oin mai.

Kualkér governu ne’ebé mak tama ba síkulu eleisaun ida sei manipula faktus atu konvense eleitór sira katak sira halo servisu ne’ebé di’ak. Iha demokrasia parlamentár ida, kuaze polítiku sira hotu, sira nia planu kobre de’it to’o eleisaun tuir mai. Maibé, ami hein katak Timor-Leste nia polítika-na’in sira la bele fiar ba sira nia propaganda rasik, tanba ida ne’e bele prevene sira atu adopta polítika sira ne’ebé sei avansa dezenvolvimentu sustentável no ekitável, polítika sira ne’ebé mak Timor-Leste presiza urjentemente. Ita nia povu – liu-liu tokon sorin ne’ebé nafatin moris iha pobreza nia laran – merese di’ak liu ida ne’e.

Governu nia komunikadu imprensa sita Banku Mundiál nia East Asia and Pacific Economic Update husi fulan Outubru: “Timor-Leste aprezenta an ho futuru ida ne’ebé la hanesan kompletamente ho pasadu ne’ebé liubá daudaun ne’e. Antes, sai hanesan nasaun ida mós iha mundu ne’ebé maka dependente liu ba reseita sira husi mina-rai (petróleu), bele sai hanesan nasaun pós-mina-rai, iha de’it tinan lima nia laran  … Esforsu Governu nian sira atu halo reforma hatudu daudaun ona rezultadu, ne’ebé bele haree investimentu diretu estranjeiru ne’ebé mosu mai maka’as” no afirma katak ba “tinan 2016 no tinan 2017, hein katak kreximentu internu kontinua iha  nivel ne’ebé hanesan no iha tinan rua ikus ne’e nian, ho previzaun kreximentu nian ida entre 5,0% no 5,5% .”

Maibé, relatóriu Banku Mundial ne’ebé hanesan mós hatete katak “Dezenvolvimentu ekonomia doméstika sei sai esensiál. Tanba laiha dezenvolvimentu kampu mina foun ne’ebé la’o hela no posu atuál sira sei maran lalais liu, ami espekta katak Timor-Leste sei sai nasaun pós-mina-rai iha de’it tinan lima nia laran. Produsaun mina, esportasaun no valór akresentadu brutu husi setór mina offshore sei tun lais liu kada tinan iha tinan hirak oin mai. ... Timor-Leste tenke uza rekursu limitadu ne’e ho efetivu no implementa reforma xave sira atu suporta ekonomia ida ne’ebé diversifikadu liu tan. .... Kombinasaun ida entre investimentu marjinal no kustu aas mós hamosu pergunta importante sira kona-ba kualidade no prioritizasaun programa investimentu [infrastrutura] nian. … Atu atinje rezultadu di’ak liu en termus impaktu ekonomia no sosiál ba tempu naruk, presiza jestaun ne’ebé efetivu ba programa investimentu públiku atu garante katak projetu sira ne’ebé prioritiza ona sei iha retornu ne’ebé aas no suporta progresu ne’ebé metin no lalais tuir dalan dezenvolvimentu ekonómiku ne’ebé viavel. Knaar ida ne’e presiza planeamentu ne’ebé tasak, fundamenta ho análize ne’ebé forte.”

Governu mós sita komunikadu imprensa iha fulan Novembru husi FMI, FMI remata ona vizita téknika ba Timor-Leste: “Atividade ekonómika iha Timor-Leste sa’e daudaun iha ritmu ida ne’ebé satisfatóriu no tenke mantein dinámika ne’e iha tinan oin .... perspetiva ba tempu badak en jerál favoravel nafatin, ho rekuperasaun ba kreximentu atividade naun-petrolíferu ne’ebé la’o nafatin akompaña ho inflasaun ne’ebé tun.”

Maibé, FMI kontinua dehan “perspetiva ba médiu-prazu depende kritikamente ba diversifikasaun ekonomia tanba kampu mina ne’ebé atualmente prodús hela sei remata iha 2020....  Tanba projeksaun ba levantamentu (osan ne’ebé sei hasai) husi Fundu Petrolíferu mak bo’ot liu duké rendimentu sustentável estimativu, FP nia saldu sei tun liu iha médiu-prazu ... Governu tenke prioritiza investimentu públiku ho kuidadu liu, hodi foka ba projetu sira ho retornu aas ne’ebé determina husi avaliasaun rigorozu ba investimentu.”

Governu nia komunikadu imprensa sita Panorama Orsamentál husi Orsamentu Estadu Livru 1 katak “setór la’ós-petrolíferu reprezenta 39% husi produtu Internu Brutu [PIB] reál Timor-Leste nian no katak PIB la’ós-petrolíferu sa’e ba 5,9%”. Maske ida ne’e teknikamente loos, maibé subar pontu xave rua:

1. Persentajen PIB ‘la’ós-petrolíferu’ husi PIB total la sa’e tanba setór la’ós-petrolíferu aumenta – persentajen ne’e sa’e tanba PIB petrolíferu tun 40% iha 2014. Setór petrolíferu tun lalais tanba kampu mina no gás besik maran ona. PIB totál tun 28% iha 2014, entaun maske PIB la’ós-petrolíferu agora aumenta uitoan, ne’e hanesan parte ki’ik ida ne’ebé bo’ot uitoan, husi total “pizza” ne’ebé ki’ik liu.
   
2. Komponente ne’ebé bo’ot liu husi PIB ‘la’ós-petrolíferu’ – no besik hotu nia kreximentu – mak finansa husi gastu Governu nian. Governu nia gastu iha 2014 (hafoin ajusta ho inflasaun) aumenta 23.2% kompara ho iha 2013, no 90% despeza ne’e mak finansa husi rendimentu husi mina no gás (rendimentu petrolíferu).

La’o Hamutuk iha preokupasaun kona-ba uza PIB nu’udár sasukat (indikadór) ba lala’ok ekonómiku nian (tanba PIB hatudu de’it kona-ba oinsá ema ho osan nia situasaun moris, no la inklui ema sira ne’ebé ho osan ki’ik). Maske nune’e, ami halo gráfiku ida ne’e atu halo komparasaun entre PIB petrolíferu ho PIB la’ós-petrolíferu, tinan-tinan. Dadus ne’e ajusta ona ba númeru populasaun no inflasaun. Númeru ba 2003-2014 ne’e mai husi Governu nia Relatóriu Konta Nasionál foun, no númeru 2015 nian mak bazeia ba FMI nia estimatizasaun ne’ebé halo iha tinan ida ne’e. Ba 2016 to’o 2021, gráfiku ne’e hatudu FMI nia projeksaun ne’ebé asume katak PIB la’ós-petrolíferu sei sa’e entre 5.5% – 6.5% kada tinan.

Maibé, La’o Hamutuk fiar katak FMI nia projeksaun optimistiku demais tanba razaun rua tuir mai ne’e.

1. Sira nia PIB setór petrolíferu bazeia ba informasaun ne’ebé tuan ona. Iha proposta Orsamentu Estadu 2017, Governu redús ninia projeksaun ba reseita mina iha futuru ba metade, no ida ne’e signifika katak PIB petrolíferu mós sei tun lalais liu kompara ho FMI nia projeksaun.
   
   
2. 
   Maioria kreximentu PIB ‘la’ós-petrolíferu’ mai husi Governu nia despeza (no osan ne’e 90% mai husi mina nian), hanesan hatudu iha gráfiku ne’e. Se ita ignora barra rua iha leten liu – signifika konstrusaun no administrasaun públiku – ita bele haree katak kreximentu iha setór la’ós-petrolíferu, ne’ebé prinsipalmente la’ós depende ba Governu nia despeza, kreximentu iha setór la’ós-petrolíferu ne’e la mantén ho inflasaun no kreximentu populasaun. (Gráfiku ida ne’e dezagrega haktuir setór uza ‘aproximasaun produsaun’ ba PIB, maibé gráfiku sira seluk iha artigu ida ne’e uza ‘aproximasaun despeza’ iha ne’ebé la bele dezagrega tuir maneira ida ne’e.)

La’o Hamutuk uza Governu nia projeksaun ba reseita mina no despeza Governu nian atu halo ami nia projeksaun ba PIB petrolíferu no la’ós-petrolíferu. Kontribuisaun husi setór petrolíferu nian oras ne’e ki’ik liu ona, no sei sai ki’ik liu tan hafoin tinan 2017. Governu projekta katak ninia despeza (ne’ebé kada tinan aumenta rata-rata 18% hahú husi 2009 to’o 2014) sei hanesan iha 2021 no 2016, maibé despeza sei sa’e boot liu entre 2017 to’o 2020. Ne’e duni maske ami nia análize asume katak kreximentu real 5% kada tinan iha parte PIB la’ós-governu ‘la’ós-petrolíferu’ nian, ami konklui katak PIB totál per capita iha 2021 sei sai $1,031 kada ema ida kada tinan (folin dolares iha 2010 nian). Ida ne'e dehan katak PIB ba kada ema sei $4.75 kada loron ida (uza folin dolares iha 2021 nian), maizumenus 25% husi valór entre 2006 to’o 2013 nian.

Iha FMI nia fórmula ne’ebé optimístiku liu espekta katak PIB sei sa’e ba $6.46 kada ema kada loron (uza dolares 2021), no karik ida ne’e fahe ho hanesan, sei sufisiente atu lori kada ema Timor hotu sa’e ba iha liña pobreza nia leten, maibé seidauk sufisiente atu sira bele goza moris ne’ebé komfortável liu. Maibé, karik padraun ne’ebé akontese to’o agora ne’e mak kontinua nafatin — iha ne'ebé maioria atividade ekonómiku fó benefísiu ba ema uitoan de’it — pobreza bele sai aat liu fali kompara ho ohin loron.

Ami konkorda ho deklarasaun iha Governu nia komunikadu imprensa no Programa ne’ebé hatete katak “iha nesesidade urjente ida atu diversifika ita-nia ekonomia [liu husi foka ba] espansaun no modernizasaun ba ita-nia setór agríkola, iha kriasaun setór turístiku ida ne’ebé forte no iha enkorajamentu atividade setór privadu nian sira na nivel superiór sira, liu husi ativa indústria sira, inklui kreximentu no espansaun empreza ki’ik no empreza mikro sira”. Iha fulan Outubru kotuk, Ministériu Finansas hatete ba Parlamentu katak agrikultura (hamlaha ho malnutrisaun), saúde, edukasaun, bee-moos/saneamentu, infrastrutura báziku no eleisaun mak Governu nia “prioridade nasionál” ba 2017.

Maske La’o Hamutuk hein katak ida ne’e mak realidade duni, maibé iha alokasaun sira iha proposta orsamentu 2017 nian hatudu realidade seluk. Iha proposta orsamentu ida ne’e hatudu katak Governu la fó prioridade ba setór hirak ne’e. Alokasaun iha 2017 ba edukasaun no agrikultura sei ki’ik liu kompara ho alokasaun sira ne’ebé halo ona dezde 2012, no saúde, bee-moos ho infrastrutura rurál nian kontinua hetan alokasaun ne’ebé la adekuadu. Alokasaun bo’ot liu – ho valór tokon atus lubuk ida– mak tau ba iha projetu auto-estrada, aeroportu no Supply Base (Tasi Mane nian), ZEESM, Aeroportu Dili no Portu Tibar, maibé projetu sira ne’e seidauk klaru katak sei fó duni benefísiu ekonómiku ka sosiál ba maioria povu Timor-Leste nian.

Kada Governu iha nasaun hotu hili faktus espesífiku no konta istória atu kria imajen ne’ebé pozitivu kona-ba ninia polítika. Tanba ne’e, grupu sosiedade sivíl sira hanesan La’o Hamutuk – no mós jornalista, akadémiku, parseiru dezenvolvimentu no sidadaun baibain sira –  mak iha papél bo’ot atu ezije katak Governu ko’alia loos. Ida ne’e mak ami tenta atu halo ona liu husi publikasaun ida ne’e, no mós iha ami nia submisaun no aprezentasaun ba iha Parlamentu Nasionál.

Importante liu mak Deputadu/a sira, funsionáriu tékniku públiku sira no polítika na’in ne’ebé iha konsiénsia di’ak sira mak iha responsabilidade atu garante katak deklarasaun ‘relasaun públiku’ sira ne’ebé koko manipula públiku la bele implementa nudár polítika naksalak sira ne’ebé estraga Timor-Leste nia oan sira nia futuru. Ami hein katak sira prontu duni atu hala’o knaar ida ne’e.

Come to public discussion on the 2017 budget and economic sustainability

Tetum iha kraik

La’o Hamutuk  presented our analysis of the proposed 2017 General State Budget to Parliament's  Committee C and its Panorama Orsamentál budget seminar, and we have discussed it with Members of Parliament.  Nevertheless, Parliament approved the budget in generality, and specific amendments are currently being analyzed by a closed-door committee, with final debate and voting on the specifics of the budget law to take place before 14 December.

However, we believe that it is important for the public to have access to this information, as well as to perspectives from civil society, academics, students, journalists and international agencies working in Timor-Leste.

Therefore, La’o Hamutuk would like to invite you to a public meeting, which will include a presentation by La’o Hamutuk on the budget and one by a representative of the Central Bank of Timor-Leste about the Petroleum Fund. The principal language of the meeting will be Tetum.

Public Meeting on the proposed 2017 State Budget and Timor-Leste’s economic sustainability
Tuesday, 6 December 2016

Please join us to share constructive ideas which will help us all understand more about Timor-Leste’s economic and financial situation, and the impact that the 2017 State Budget will have for Timor-Leste’s people. Click here for more information and documents about the proposed State Budget.

=============== Tetum tuir mai =================

La’o Hamutuk halo ona submisaun no aprezentasaun ba semináriu Panorama Orsamentál ho ami nia hanoin kona-ba proposta Orsamentu Jerál Estadu 2017, no ami diskute proposta ne’e ho Deputadu sira.

Maibé, importante mós atu fahe informasaun ne’e ho públiku, no atu rona perspetiva no komentáriu husi sosiedade sivíl, akadémiku, estudante, jornalista no ajénsia internasionál sira.

Ho hanoin ida ne’e mak La’o Hamutuk sei hala’o enkontru públiku ida. La’o Hamutuk sei aprezenta ami nia analíse kona-ba proposta Orsamentu ba 2017 no Timor-Leste nia ekonomia, no reprezentativu ida husi Banku Sentrál sei mós fahe sira nia perspetiva kona-ba Fundu Petrolíferu.

Enkontru Públiku kona-ba proposta Orsamentu Jerál Estadu 2017 no Timor-Leste nia sustentabilidade ekonómiku
Tersa-feira, 6 Dezembru 2016

Ho ita bo’ot sira nia prezensa no partisipasaun hodi fó hanoin konstrutivu mak sei ajuda ita hotu atu komprende kle’an liu tan kona-ba Timor-Leste nia situasaun ekonómiku no finanseiru, no Orsamentu Estadu 2017 nia impaktu ba povu Timor-Leste nia moris. Klik iha ne'e atu hetan informasaun tan konana proposta Orsamentu Estadu.