Timor-Leste nia tasi tenke mantein nudár area protejidu ba ikan-baleia no golfiñu

Afirmasaun Konjunta Husi Sosiedade Sivíl 

Link to this blog in English

Dili, 10-10-2018

Husi Timor-Leste from Below video, Episode 6.

Haree asaun sira foin daudaun husi Governu Japaun atu promove kasa ka kaer ikan-baleia sira, ami preokupa katak asuntu ne’e bele tama iha diskusaun durante vizita Ministru Estranjeiru Japaun nian iha Timor-Leste hahú loron 11 Outubru. Ami hakarak afirma ami nia pozisaun no suporta atu Timor-Leste tenke mantein sai area protejidu ba animál protejidu sira hanesan ikan-baleia no golfiñu (ikan-toniñu ka lumba-lumba).

Nudár organizasaun ne’ebé tau matan mós ba ambiente, ami afirma ho kompromisu atu proteje ita-nia ambiente natural ne’ebé úniku no sai patrimóniu importante rai doben Timor-Leste nian, ami mós apoiu Governu nia suporta ne’ebé forte ba dezenvolvimentu eko-turizmu marina (tasi nian), protesaun ba riku soin tomak ne’ebé moris iha tasi laran, hanesan hakerek iha Planu Estratéjiku Dezenvolvimentu Nasionál 2011-2030 no Polítika Turizmu ne’ebé foin estabelese.  Ami rekoñese no suporta esforsu husi Ministériu Turizmu (ho nia parseiru sira) atu promove no dezenvolve setór eko-turizmu tasi (Marina), liuhosi ninia programa tau matan ba ikan-baleia no golfiñu. Programa ne’e sei kolabora no servisu hamutuk ho ajénsia turizmu lokál sira, organizasaun eko-voluntáriu no komunidade peskadór lokál sira. Iha sorumutu ikus Konsellu Ministru nian, aprezentasaun “Planu Dezenvolvimentu ba Ekonomia Sustentável bazeia ba Eko-Turizmu Marina iha Timor-Leste” deskreve proposta “hodi transforma Timor-Leste atu sai referénsia iha turizmu luku tasi (diving) no haree movimentu furak ikan-baleia no golfiñu nian iha tasi (whale watching) iha rejiaun Sudeste Aziátiku” no inklui “protesaun no Konservasaun ba rikusoin tomak ne’ebé moris iha tasi laran.” Maski ami seidauk hatene ho kompletu proposta ne’e no hakarak atu aprende tan, hodi apoiu ami-nia opiniaun katak eko-turizmu tasi iha poténsia boot, se hetan tratamentu di’ak no halo protesaun loloos.

Golfinu "Spinner" iha Baucau. Foto husi Kevin Austin.

Ami konkorda tebes katak presiza iha protesaun ba ita-nia tasi, no eko-turizmu tenke sai parte husi planu dezenvolvimentu diversifikadu no ekonomia ne’ebé sustentável. Persentajen boot husi ita-nia populasaun depende ona sira nia moris ba riku soin iha tasi laran no tasi ibun hodi hetan ai-han, nutrisaun no rendimentu ba sira nia família uma kain nian. Se rekursu sira-ne’e dezenvolve ho di’ak, hahú husi buat ne’ebé Governu estabelese tiha ona, dezenvolve indústria turizmu ho ikan-baleia no golfiñu iha poténsia atu lori benefísiu ekonómiku ne’ebé signifikante ba ita-nia komunidade lokál sira. Agora ita iha nesesidade urjensia atu diversifika ita-nia ekonomia, haluan no haforsa setór sira ne’ebé la’ós mina hanesan agrikultura, peska, indústria produsaun ho eskalaun ki’ik sira no turizmu. No sira tenke hetan dezenvolve ho kompromisu boot hodi tuir polítika ida ne’ebé sustentável nune’e bele garante no proteje ita-nia ambiente ne’ebé sei frajil hela nudár patrimóniu naturál. Ita nia tasi sai ona area protejidu ba ikan-baleia no golfiñu sira (haree Diploma Ministeriál No.18/MAP/MCIA/II/2017) no ida ne’e oferese buat úniku no espesiál ne’ebé bele atrai turista barak.

Artigu balu foin daudaun fo sai husi ema akadémiku no media internasionál sira, hatudu Timor-Leste nia poténsia eko-turizmu di’ak tebes hanesan lalehan. Liu-liu fatin atu ba haree movimentu ikan-baleia boot no golfiñu sira. Maski ita nia tasi la luan, maibé tasi kle’an no iha nia laran, bele estimatiza katak um tersus ka 1/3 (33%) husi tipu ikan-baleia no golfiñu sira tomak (ne’ebé hamutuk hetan naran sientífiku ‘cetaceano’) moris iha Timor-Leste. Kompañia media internasionál konsege hatudu no promove ona poténsia eko-turizmu Timor-Leste nian liuhosi fotografia no video ne’ebé promove Timor-Leste nu’udar fatin di’ak atu haree ikan-baleia azúl sira iha migrasaun ba parte súl, nani hamutuk ho ikan-baleia ‘sperm’ sira no haree baleia no golfiñu barak tebes. Atividade haree movimentu ikan-baleia no golfiñu sira konsidera nudár setór turizmu globál ne’ebé aumenta; iha mós interese sériu husi ema biolojika-marina hodi estuda no hasai fotografia ba animál furak tasi nian sira ne’e. Haree hamutuk ho ita nia paizajen ne’ebé maioria agrikultura orgánika, to’os permakultura nian, paizajen tasi ninin ne’ebé furak, no ahu-ruin ho kór oioin, ita-nia ikan baleia no golfiñu sira sai parte husi ita-nia rikusoin nasionál. Ne’e mós bele hatudu buat úniku husi Timor-Leste ba mundu no posibilidade boot atu aumenta turizmu nasionál no internasionál. Bele aprende husi rai-Sri Lanka ne’ebé harii indústria turizmu ho baze ba atividade sira atu haree ikan-baleia no golfiñu, maibé sira-nia númeru ikan-baleia no golfiñu sira menus tebes kompara ho Timor-Leste nian.

Maski nune’e, eko-turizmu marina só bele buras se ita bele jere ita-nia rekursu sira ho di’ak no proteje ita-nia rikusoin hanesan ikan-baleia no golfiñu husi ameasa sira hanesan kasa komersiál (commercial hunting), impaktu husi ró boot, no fo’er plástiku  (lixu plástiku). Ameasa sira ne’e bazeia ba grupu Organizasaun ambientál internasionál Greenpeace hato’o katak ameasa sira kontinua aumenta. Nune’e Komisaun Baleia Internasionál (International Whaling Commission – IWC) diskute maka’as kona-ba ameasa hirak ne’e, iha Florianopolis, Brazíl fulan kotuk. IWC harii iha tinan 1946 no agora iha membru sira hamutuk nasaun 89 ho responsabilidade ba konservasaun no jestaun liga ba indústria kasa ikan-baleia hodi hasai baleia nia mina, na’an no ruin sira. Iha tinan 1986, IWC halo regra hodi bandu pratika kasa no oho ikan-baleia ho interese komérsiu, no regra ba bandu ne’e sei eziste to’o ohin loron.

Iha sorumutu IWC foin daudaun, Japaun introdús proposta kontroversiál, ho suporta husi nasaun 25, ne’ebé buka atu hasai regra bandu ne’e hodi promove “ezisténsia hamutuk” entre konservasaun no kasa/oho ikan-baleia ba komérsiu. Hafoin debate manas no maka’as, ikus mai maioria membru IWC rejeita proposta Japaun nian, no afirma regra bandu internasionál katak labele kasa/oho ikan-baleia ba interese komérsiu. Sira barak defende pozisaun ne’e tanba sira haree la iha nesesidade iha tempu agora hodi estraga populasaun ikan-baleia sira.

Iha sorumutu hanesan, membru CPLP Brazíl propoin atu iha area protejidu ba ikan-baleia sira iha Tasi Atlántika Súl, maibé proposta ne’e la pasa tanba la to’o dois tersus (2/3) ka 66% votu ne’ebé presiza. Bainhira Timor-Leste mantein ita nia tasi nudár area protejidu ba ikan-baleia no golfiñu, ita la’ós de’it proteje ita-nia rikusoin nasionál, maibé ita mós oferese ba mundu fatin úniku no espesiál atu haree animál sira-ne’e.

Konstituisaun RDTL Artigu 61.3 hato’o: “O Estado deve promover acções de defeza do meio ambiente e salvaguardar o desenvolvimento sustentável da economia.” Timor-Leste ratifika Konvensaun internasionál ONU nian kona-ba Lei Tasi (UNCLOS 1982) ne’ebé haktuir responsabilidade estadu nian ba jestaun rekursu marina, no ita mós membru husi Organizasaun Maritima Internasionál. Iha tinan 2007, Timor-Leste ratifika Konvensaun Internasionál ba Bio-Diversidade (CBD), hafoin dezenvolve Planu Asaun Estratéjiku Timor-Leste nian ba Biodiversidade Nasionál (2011-2020) ne’ebé inklui protesaun ba abitasaun rikusoin marina.

 Timor-Leste nia diversidade marina ne’ebé importante iha nivel global presiza no merese atu hetan protesaun no prezervasaun liuhosi define area protejidu no parke nasionál marina sira. Governu no Ministériu Turizmu agora presiza dezenvolve enkuadramentu legál importante no nesesáriu, ho infrastrutura, formasaun ba ospitalidade iha setór turizmu, akreditasaun ba ajénsia turizmu sira, no komprende rikusoin sira hodi bele jere no tau matan ho di’ak ba oin. Nune’e ita bele asegura indústria eko-turizmu ne’ebé sustentável, protesaun ba ikan-baleia no golfiñu sira hodi fó benefísiu ba komunidade lokál.

Timor-Leste tenke forte atu proteje ita-nia rikusoin no fó solidariedade ba membru IWC ne’ebé buka atu proteje ikan-baleia no golfiñu sira iha mundu. Ita tenke kontra “peska ikan-baleia sustentável” (“sustainable whale fishing”) tanba tuir loloos termu ne’e iha lia-inglés la eziste. Ikan-baleia no golfiñu sira mak ‘mamalia’ (hahoris hanesan ita umanu), la’ós ”fish”; no ita labele kail ikan-baleia, maibé tenke oho ho diman. Ita tenke asegura katak Timor-Leste sei hasoru indústria no nasaun sira ne’ebé suporta kasa ka oho ikan-baleia no golfiñu ba orientasaun komérsiu.

Hamutuk ita sei proteje ita nia tasi no area protejidu ba ikan-baleia no golfiñu sira husi sira ne’ebé iha intensaun atu estraga.

Ami ne’ebé fó ami nia afirmasaun:

• La’o Hamutuk
• Fundasaun Haburas, Friends of the Earth TL
• PERMATIL
• HASATIL Network
• Movimentu Hadomi Natureza (Mohana) 
• Konservasaun Flora and Fauna
• Asosiasaun Tafon Green
• Asosiasaun HAK
• Rede ba Rai
• Kdadalak Sulimutu Institute
• Movimentu Tasi Moos 
• RENETIL
• Oxfam iha Timor-Leste