16 October 2018

Promove Ai-han Lokál Nutritivu hodi Hakotu Hamlaha no Mal-nutrisaun

HASATIL (HAMETIN AGRIKULTURA SUSTENTÁVEL TIMOR LOROSA’E)
Rua. St.Antonio Motael – Farol, Dili Tel. (+670) 77287429 E-mail: hasatil@sapo.tl
KOMUNIKADU BA IMPRENSA KONA-BA LORON MUNDIAL AI-HAN
Promove Ai-han Lokál Nutritivu hodi Hakotu Hamlaha no Mal-nutrisaun Iha Timor-Leste

Iha eventu komemorasaun loron mundiál ai-han 2018, HASATIL nu’udar rede nasionál ne'ebé servisu ba hametin no promove agrikultura sustentável iha Timor-Leste hamutuk ho ninia membru hotu iha munisipiu 13, hakarak louva agrikultór sira hotu iha Timor laran tomak ne'ebé kontinua servisu maka’as hodi halo produsaun ai-han ba ema hotu, maski hasoru dezafiu no problema oi-oin.

HASATIL mós hakarak aproveita loron importante ida ne’e atu bolu Governu, Parlamentu Nasionál, Prezidente Repúblika no ba Públiku tomak nia atensaun ba situasaun real iha Timor-Leste liga ba produsaun ai-han iha rai laran, no dependénsia ba importasaun ai-han husi rai li’ur.

Timor-Leste nia situasaun produsaun ai-han sei nafatin laiha progresu boot hafoin liu tiha tinan 15, maski governu Timor-Leste no ajénsia dezenvolvimentu sira gasta ona osan barak ba setór ne’e. Dadus estatístika agrikultura nian husi governu hatudu katak produsaun agrikultura kontinua tun. Ita nia merkadu sira nafatin domina husi ai-han importadu, no mal-nutrisaun kontinua sai problema boot (haree dadus).

Produsaun foos kontinua tun maski durante ne’e governu tau atensaun boot liu ba parte ne’e, liu husi investimentu maka’as ba iha irrigasaun eskala boot hodi fornese bee ba natar sira no mós distribui tratór rihun haat resin ba agrikultór sira. Governu rasik rekoñese ona katak ho kondisaun ne’e Timor-Leste sei susar atu atinje nia tarjetu autosufisiensia ai-han iha tinan 2030. 

Polítika orsamental governu Timor-Leste nian la buka atu responde ba situasaun difisil iha setór agrikultura. Investimentu estadu nian ba setór Agrikultura tun ba beibeik. Ida ne’e refleta iha Alokasaun Orsamentu Jerál Estadu ba setór Agrikultura no Peska dezde 2015 to 2018 ne’e. Iha tinan 2015 Alokasaun orsamentu ba setór agrikultura mak tokon $34.457, iha 2016 tun ba tokon $24.826, iha 2017 tun tan ba tokon $21.962, no iha 2018 ne’e tun ba $14.679. HASATIL preokupa tebe-tebes ho tendénsia negativu ida ne’e no la refleta prioridade ne’ebé haktuir ona iha Planu Estratéjiku Dezenvolvimentu Nasionál 2011-2030

Bazeia ba tema loron mundiál ai-han ba tinan ida ne’e kona ba Promove Ai-han Lokál Nutritivu hodi Hakotu Hamlaha no Malnutrisaun iha 2030, HASATIL hanesan mós membru KONSSANTIL husu ba Governu tenke fó atensaun maka’as no investe ba promove produsaun ai-han iha rai laran no promove produtu ai-han lokál, hortikultura, produtu peska no pekuaria inklui ai-han indigenous no ai-han fuik sira ne’ebé eziste nanis ona iha Timor-Leste,  tanba iha valor nutrisaun di’ak liu ba ema, saúde, ambiente no ekonomia rai laran.

Hasatil mós preokupa tebes ho programa ajuda ai-han (McGovern Dole Food Aid for Education Program) Estadu Unidus Amérika nian, ne’ebé sei hafó sá sira nia influensia iha TL no iha tempu hanesan fó impaktu ba merkadorias produtu lokál iha rai laran. Kritéria prinsipál husi programa ne’e mak hanesan, ai-han ne'ebé atu ajuda ba nasaun tarjetu sira maioria tenke hola iha Estadu Unidus, tenke transporta iha ró ho bandeira Estadu Unidus nian. Maski programa ne'e ho objetivu katak ajuda ai-han ba komunidade, liu-liu ba eskola sira, kritéria ne'ebé programa ne'e aplika, sei fó benefísiu boot liu ba programa ne'e nian (ba Estadu Unidus Amerika) no bele fó impaktu negativu boot liu ba nasaun ne'ebé simu ajuda ai-han ne’e.

Informasaun preliminaria husi departamentu agrikultura Estadu Unidus nian hatudu katak Care Internasionál mak sei implementa programa Food Aid ne’e iha Timor-Leste ho total valor osan tokon $26.  Ami hakfodak katak Care sei sai implementador ba programa Food Aid Estadus Unidus Amerika nian. Ami hanoin katak pratika ne’e klaramente la tuir Care nia Food Aid policy rasik, ne’ebé rekoñese katak programa sira hanesan ne’e fó impaktu la di’ak ba nasaun ne’ebé simu.  Ami husu ba organizasaun internasionál sira, atu labele sai implementador ba programa ida ne’e, bainhira laiha estudu ne’ebé prova katak sei laiha impaktu ba agrikultura no seguransa ai-han iha rai laran.

Ikus liu, HASATIL hanoin katak, programa agrikultura sira mós tenke fó benefísiu hanesan ba feto no mane agrikultór, no maximiza agrikultór feto sira nia partisipasaun no kontribuisaun ba produsaun agríkola. Investimentu barak too oras ne’e foo benefísiu boot liu ba mane sira, en termu de hakmaan agrikultór sira nia servisu.

Tuir mai HASATIL nia rekomendasaun espesífiku ba VIII Governu Konstitusional atu konsidera:
  1. Prioritiza no hasa’e orsamentu estadu ba setór agrikultura no peska, liu-liu iha programa importante sira hanesan:
    •  Kapasitasaun, formasaun ba agrikultór no peskadór eskalaun ki’ik sira atu hasa’e
    produsaun no jestaun tuir dalan ne'ebé sustentável
    •  Fó atensaun didi’ak ba diversifika produsaun ai-han iha rai laran atu la depende maka'as ba konsume produtu ida ka rua de’it hanesan (foos no batar)  
    •  Fasilita ekipamentu prosesamentu no kapasitasaun ba grupu prosesamentu produtu agríkola sira ne'ebé mak eziste ona iha rai laran atu hadi’ak liu tan sira nia kualidade produtu, jestaun no asesu ba merkadu
    •  Promove agrikultura familiar, diversifikasaun ai-han no diversifikasaun ekonomia nudár fonte alternativu hodi substitui fundu mina rai
  2. Fó prioridade orsamentu ba promove hortikultura, hakiak animal no hakiak ikan iha nivel uma kain hodi prodús produtu ne'ebé saudável no nutrisaun di’ak ba família, atu hamenus mal-nutrisaun, no ajuda ekonomia família nian.
  3. Husu ba Organizasaun internasionál sira atu labele sai implemetador ba programa Food Aid ne’ebé sei estraga agrikultura lokál no hafraku Timor-Leste nia rezilensia seguransa ai-han ba tempu naruk.
  4. Husu ba Ministériu Edukasaun, Agrikultura no Saúde atu la bele simu implementasaun programa Food Aid iha Timor-Leste.
  5. Konstrui irrigasaun eskala-kiik iha nivel aldeia no suku hodi fornese bee ba atividade produsaun iha nivel uma kain. Presiza mós estabelese sistema kolleita bee no Konservasaun bee iha area sira ne’ebé bee menus.
  6. Promove diversifikasaun ai-han no konsiensilizasaun hodi muda kultura Han, nudár dalan ida hodi hamenus importasaun iha Timor-Leste. 
  7. Tau matan no halo avaliasaun kritiku ba projetu ajénsia internasionál sira iha Timor-Leste atu labele hamosu problema tempu naruk ba Timor-Leste bainhira sira nia projetu remata.
  8. Hametin igualdade entre mane no feto iha asesu ba fasilidade, rekursu no oportunidade ba kapasitasaun. No mós maximiza partisipasaun no kontribuisaun feto sira nian iha etapa produsaun tomak.
  9. Promove agro-ekologia, uza rekursu lokál atu hasa’e produsaun liu husi dalan ne'ebé la estraga meiu-ambiente.

Too ba ne’e de’it komunikadu imprensa. HASATIL no membru sira tomak prontu nafatin atu kontribui ba dezenvolvimentu ne'ebé promove agro-ekolojia no hametin soberania ai-han iha Timor-Leste.

Viva Soberania Ai-han!  Viva HASATIL! Viva Agrikultór no POVU Timor-Leste!

Dili, 15 de Outubru 2018

Gil Boavida
Koordenador Rede HASATIL

Grupu Trabalho Advokasia
  • La’o Hamutuk
  • Asosiasaun HAK
  • ETADEP
  • Permatil
  • Fundasaun Haburas
  • Kdadalak Sulimutu Institutu
  • Fokupers
  • Raibea

No comments:

Post a Comment