20 July 2020

Akontesimentu Ekonomia Global fó impaktu boot ba Timor-Leste

Bele download PDF or link to English version.  Atualiza iha loron 14 no 31 Marsu, Maiu no Jullu; hare iha kraik.
Hahú husi 2015, Timor-Leste nia reseita estadu iha dependénsia ba rendimentu husi investimentu osan ne’ebé rai iha Fundu Petrolíferu, la’ós ona osan husi royalties no taxa husi ekstrasaun no esportasaun mina no gás.

Haree ba kondisaun dependénsia ba investimentu ne’e, La’o Hamutuk deside atu buka hatene oinsá mudansa ekonomia no merkadu finanseiru global sei afeta ba kapasidade no estabilidade finanseira husi governu Timor-Leste nia operasaun sira. Maske ita labele influénsia eventu ida ne’e, ita presiza komprende kona-ba eventu sira ne’e.

Artigu ne’e hanesan analiza prelimináriu kona-ba oinsá mudansa sira ne’ebé foin mosu lalais ne’e – husi 12 Fevreiru too 12 Marsu – fó impaktu ba ita nia Fundu Petrolíferu (FP).

Presu ekidade tun

Merkadu ekidade (asoens / stocks) iha Estadus Unidus no nasaun sira seluk tun kuaze 26% durante loron 30 ikus ne’e. Fundu Petrolíferu iha ekidade ho valór kuaze biliaun $6.6 iha fin 2019.  Tanba ne’e, ita lakon kuaze biliaun $1.7 valór merkadu husi ita nia asoens. Maibé, merkadu sempre iha flutuasaun (tun-sa’e), no ita la presiza fa’an ita nia asoens sira agora. Se situasaun iha merkadu sai di’ak fali (hanesan akontese iha 2019), ita sei lakon osan ki’ik liu, maibé se merkadu kontinua tun (hanesan akontese iha 2008), ita sei lakon osan barak liu tan.

Timor-Leste nia Fundu Petrolíferu mak úniku iha mundu ne’ebé la lakon osan durante krize ekonómiku global iha 2008, tanba ita la investe iha asoens. (Nasaun Noruega lakon kuaze biliaun $90.) Iha 2010, bainhira halo revizaun ba lei Fundu Petrolíferu hodi bele uza Fundu ne’e barak liu ba sosa asoens, La’o Hamutuk husu “Oinsá Governu Timor-Leste bele responde ba preokupasaun publiku no politikus nain sira seluk wainhira ita nia fundu nia kapital sei lakon tamba deit labele kontrola merkadu, ka tamba desizaun ida be ladiak husi jestor eksternal ida? Oinsa ita bele asegura katak ita sei la sosa bainhira presu sae no fan bainhira nia presu tun?”

Mezmu ita la fa’an ita nia asoens, balansu iha FP nafatin uza atu kalkula Rendimentu Sustentável Estimativa (RSE) ne’ebé determina osan montante hira mak bele foti ho sustentável husi Fundu Petrolíferu. Redusaun biliaun $1.7 iha balansu FP sei hamenus RSE kuaze tokon $51 – kuaze dala-rua despeza estadu nian ba agrikultura kada tinan.

Taxa funan (taxa de juros) tun

Fundu Petrolíferu barak liu mak investe iha títulu husi governu sira, inklui biliaun $7.9 (iha fin 2019) iha títulu ne’ebé fó sai husi Tezouru Estadu Unidus nian, no biliaun $1.6 iha nasaun seluk. Taxa rendimentu ba médiu-prazu iha títulu Estadu Unidus nian tun too menus husi metade nivel uluk nian. Tinan kotuk, Fundu Petrolíferu hetan tokon $420 iha funan no dividendu,3 no ida ne’e bele tun too tokon $200 se bainhira taxa hirak ne’e kontinua hanesan agora ne’e. Se sira ne’e tun ba nafatin, Timor-Leste sei simu funan no dividendu ki’ik liu tan.

Presu mina tun

Maski esportasaun mina no gás la sai ona hanesan Timor-Leste nia fonte rendimentu prinsipál (no karik sei para total iha tinan tolu nia laran), Fundu ida ne’e nafatin sei simu reseita balu husi esportasaun mina no gás. Tinan kotuk, Ministériu Finansa projeta katak reseita husi mina no gás iha 2020 sei too tokon $595, bazeia ba espetasaun presu mina Brent nian, $62 kada barríl. Maibé, iha 13 Marsu presu mina mak $33 kada barríl. Se presu estabiliza nafatin iha maizumenus $35, reseita petróleu iha 2020 sei la too metade husi Ministériu nia projesaun, no RSE sei tun kuaze tokon $12. Se presu tun liu tan, nia impaktu sei aat liu tan.

Presu mina ne’ebé ki’ik, sei limita dezenvolvimentu petróleu iha mundu tomak, inklui Timor-Leste. Se presu kontinua ki’ik nafatin, projetu sira se fó lukru menus ba kompañia sira, no Bayu-Undan bele para produsaun lalais liu duké 2022, tuir saida mak sira planu ona. (Ida ne’e akontese ona ba Kitan iha 2015).

Kompañia no investór sira sei avalia fila fali valor ekonomia husi kada projetu iha futuru – inklui esplorasaun iha rai maran (onshore), Buffalo, Chuditch, Greater Sunrise no Tasi Mane – iha posibilidade atu atraza ka kansela. Avizu atu oferese fatin ba halo projetu (bidding round) ne’ebé ANPM daudaun ne’e halo hela sei hetan interese menus liu, tanba kompañia sira lakohi atu hahú ka investe iha projetu foun bainhira sira laiha serteza katak sira sei hetan lukru. 

Konkluzaun

Se presu no taxa funan nian ne’ebé diskute iha leten la sai aat liu (ka di’ak liu) durante tinan ida ne’e nia laran, too tinan 2020 nia rohan Timor-Leste nia investimentu Fundu Petrolíferu sei lakon loloos (net loss) kuaze biliaun $1.5. Ida ne’e biliaun rua menus manán tokon $640 ne’ebé Ministériu Finansa estimatiza iha proposta orsamentu 2020 nian. Aleinde ne’e, royalty no taxa husi mina no gás sei ki’ik liu tokon $300 husi saida mak Governu projeta ona ‘ho prudente.’ Lakon hirak ne’e bele kontinua iha tinan hirak tuir mai.

Tinan kotuk, La’o Hamutuk estimatiza katak Fundu Petrolíferu bele mamuk iha 2028, mezmu se ita la uza Fundu ne’e hodi selu ba kustu kapitál projetu Tasi Mane nian. Se tendénsia global ne’e mantén nafatin, FP sei mamuk lalais liu tan tinan balu.

Governu VIII sesante hakarak foti tokon $250 husi Fundu Petrolíferu tanba funsionamentu ba mákina estadu labele kontinua se laiha osan. Hahú iha Janeiru (hanesan iha 2018), despeza estadu ne’ebé la’o neineik hafraku ekonomia iha territóriu Timor-Leste, halo ema kiak sira sai kiak liu tan. Redusaun maka’as atividade ekonomia hatudu katak populasaun sira depende maka’as ba estadu nia despeza husi Fundu Petrolíferu – no hatudu frakeza boot husi ita nia ekonomia.

Ameasa ne’ebé oras ne’e mosu ba Fundu ne’e nia ezisténsia médiu-prazu la’ós buat foun ida, no bele sai aat liu tan tanba mudansa klimátika no redusaun iha balansu Fundu nian. Ameasa hirak ne’e fó hanoin fali mai ita katak Timor-Leste iha urjénsia tebes atu diversifika nia ekonomia ne’ebé la’ós petróleu ka investimentu. Ita liu ona tempu ita tenke investe iha ita nia labarik sira nia saúde no edukasaun, ho nune’e ita nia produtividade, sustentabilidade no ekonomia ne’ebé ekitável – agrikultura, indústria ki’ik no eko-turizmu – bele hakbiit ita nia povu sira atu bele moris ho prospero. Ida ne’e mak dalan úniku atu atinje Fundu Petrolíferu nia objetivu atu benefisia jerasaun sira tuir mai.

Glosáriu:

  • Royalty: rendimentu ne’ebé estadu hetan husi produsaun mina no gas iha tasi okos ka rai maran.
  • Ekidade: asoens (stocks) ne’ebé investe iha kompañia sira, fa’an iha merkadu internasionál
  • Títulu: Hanesan instrumentu ba rendimentu fiksa ne’ebé reprezenta fó empréstimu ruma, espesialmente ba Governu E.U. no nasaun sira seluk
  • Dividendu: distribuisaun ne’ebé rekompensa husi lukru balu ne’ebé kompañia na’in hetan no selu balu ba na’in husi asoens. 
  • Kustu Kapitál: despeza ne’ebé tenke halo atu harii projetu ida

Atualiza 14 Marsu 2020

Ami hakerek artigu iha leten iha loron 13 Marsu 2020, bazeia ba presu no taxa sira bainhira oras negósiu remata iha loron Kinta, 12 Marsu. Loron ida tuir mai, númeru tolu ne’ebé ita uza atu halo projesaun sira hadi’ak uitoan, no montante ne’ebé Fundu Petrolíferu sei lakon agora mak biliaun $1.8, menus husi lakon biliaun $2.3 ne’ebé ami kalkula horiseik. Númeru sira ne’e sei muda loron-loron, no bele sai di’ak liu ka aat. Ita-boot bele hetan dadus husi:

Atualiza 31 Marsu 2020

Trimestre ikus mak monu iha fulan ida ne’e nia rohan, situasaun merkadu asoens iha Estadus Unidus aat liu dezde 2008. Situasaun iha Fundu Petrolíferu hetan aat liu iha 23 Marsu nia laran, maibé hafoin di’ak uitoan iha fulan ne’e nia rohan, to’o hanesan ho nivel ida ne’ebé artigu ida ne’e orijinálmente hakerek. Se bainhira situasaun ne’e nafatin la iha mudansa durante periodu 2020, balansu Fundu iha tinan ikus sei iha kuaze biliaun $1.9 menus liu kompara ho saida mak espekta iha inísiu tinan ida ne’e. (Artigu orijinál uza 12 Fevereiru hanesan referénsia; hahú husi pontu inísiu ne’e lakon ona rendimentu kuaze biliaun $2.1.)

Relatóriu mensal BCTL iha fulan Fevreiru hatudu balansu Fundu ne’ebé tuun ba tokon $344 durante fulan Fevreiru. Maske relatóriu fulan Marsu nian seidauk hasai, La’o Hamutuk estimatiza katak ida ne’e sei tuun ba tokon $500.

Ba Timor-Leste, bainhira folin mina ne’ebé kontinua tuun sei sai preokupasaun boot liu tan, no peritu sira hanoin katak ida ne’e bele tun to’o menus $20/barríl. Reseita husi kampu Bayu-Undan durante 2021-2023 sei menus husi montante tokon $260 hanesan ne’ebé sira antisipa ona. Ba tempu naruk, projetu petróleu ne’ebé iha planu hahú tiha ona – inklui Buffalo, atividade iha rai laran, Chuditch no Greater Sunrise – sei labele hetan lukru sufisiente atu justifika sira nia kapitál investimentu, no sei la kontinua atu dezenvolve; atu hanesan mós ho projetu sira iha mundu tomak ne’ebé kanseladu.

Atualiza 1 Maiu 2020

Durante fulan Abril, merkadu asoens iha Estadus Unidus sa’e maka’as liu kompara ho fulan sira seluk durante tinan 33 nia laran, ne’ebé konsege rekupera fila fali maizumenus 60% husi lakon sira ne’ebé akontese iha médiu Fevereiru too iha semana datolu Marsu. Tanba impaktu ekonomia husi surtu sei kleur atu remata, analista sira preokupa katak rekuperasaun ne’e sei la kontinua.

Mina nia folin no taxa funan iha títulu Estadu Unidus tuun uitoan durante Abril. Se situasaun hanesan iha 30 Abril kontinua nafatin too tinan 2020 nia rohan, balansu Fundu Petrolíferu ne’e nian iha tinan nia rohan sei menus liu maizumenus biliaun $1.25 husi espetasaun iha inísiu tinan ida ne’e.

Balansu Fundu Petrolíferu iha fin Marsu mak biliaun $17.03, tuun tokon $476 durante fulan Marsu, no tokon $663 ki’ik liu kompara ho balansu iha inísiu 2020. Laiha levantamentu osan iha fulan Marsu. Embora balansu ba fulan Abril sa’e (dadus seidauk disponivel), manán hirak ne’e sei limita fali ho levantamentu tokon $250 atu finansia Fundu Espesiál Covid-19 no funsionamentu regular governu nian.

Maske situasaun merkadu asoens rekupera fali husi pontu ida ki’ik liu, ida ne’e nafatin sei tuun-sa’e no bele tuun liu tan, tanba surtu Covid-19 ne’e sei kontinua ba fulan barak tan.

Ba Timor-Leste, mina nia folin ne’ebé kontinua tuun ho la serteza sai preokupasaun boot ba oin, no peritu barak espekta mós katak folin mina kontinua no bele ki’ik liu $20/barrel ba fulan ka tinan balu. Rendimentu ne’ebé sei mai husi Bayu-Undan iha 2021-2023 sei la too tokon $260 ne’ebé projeta ona. Ba tempu naruk, projetu petroleum ne’ebé iha ona planu – inklui Buffalo, rai leten, Chuditch no Greater Sunrise – dalaruma sei la fó lukru nato’on atu justifika investimentu kapitál no bele la realiza; projetu sira hanesan ne’e barak iha mundu tomak mak kansela ona. Fundu Petrolíferu tokon $650 ne’ebé fó empresta ba TimorGap atu bele sosa asoens iha kampu Greater Sunrise nian, ne’ebé nafatin tama iha konta balansu, dalaruma sei la selu fila fali.

Aleinde ne’e, nasaun barak mak prolonga ka adia sira nia avizu atu oferese fatin ba esplorasaun (bidding round), maski ANPM nafatin iha esperansa no atu hetan aplikasaun molok fulan Outubru.

Balansu iha Fundu Petrolíferu sei tuun liu tan iha 2020 – tanba retornu negativu investimentu nian no levantamentu estraordináriu hodi responde ba surtu Covid-19 – no dalaruma sei laiha tan rendimentu petrolíferu hodi aumenta fila fali ba Fundu Petrolíferu. Oinsá Timor-Leste sei finansia nia governu hafoin buat hotu fila fali ba “normal”?

Atualiza 20 Jullu 2020

Durante fulan Maiu-Jullu, merkadu asoens iha Estadus Unidus kontinua atu sa’e, maske ekonomia iha EUA no globál kontinua atu enfrenta problema boot sira. Folin mina rekupera uitoan, maibé nafatin iha nivel metade kompara ho inísiu tinan 2020. Taxa funan iha títulu Estadu Unidus tuun uitoan durante fulan ida ne’e. 
Bainhira fulan Juñu remata, saldu iha Fundu Petrolíferu atinje biliaun $18.07, montante boot liu iha istória Fundu ne’e. Maske nune’e, reseita bainhira tinan 2020 remata sei tokon $500 menus liu kompara ho projesaun husi tinan kotuk. Tuir matadalan OJE 2020, levantamentu durante Jullu-Dezembru sei tokon $680, kompara ho tokon $250 iha Janeiru-Juñu.
ANPM prolonga bidding round ba tinan ida, ate fulan Outubru tinan 2021. No kompañia Australia Woodside, parseiru ida iha konsorsiu Greater Sunrise, dezvaloriza sira nia partisipasaun ba 45%. Ho mudansa iha lideransa iha TimorGap, Ministériu Petróleu no projetu Greater Sunrise, Timor-Leste nia futuru iha setór petróleu iha inserteza barak.
Durante fulan Abril no Maiu, Timor-Leste simu reseita petróleu rata-rata tokon $27/fulan, menus 50% kompara ho tokon $63/fulan ne’ebé Timor-Leste simu ona durante tinan 2019.
Tanba impaktu ekonomia husi surtu sei kleur atu remata, analista sira preokupa katak rekuperasaun ne’e sei la kontinua.

 

No comments:

Post a Comment