Revizaun orsamentu estadu tenke justu, igualitáriu no sustentavel.

Link to this blog in English.

Dadaun ne'e, Parlamentu Nasional debate proposta alterasaun ba Orsamentu Jerál Estadu ba tinan 2021 hodi bele enfrenta kalamidade rua husi pandémia Covid-19 no inundasaun semana kotuk. Bele hetan informasaun tan iha ne’e, inklui proposta lei.

Iha loron 12 Abril, La’o Hamutuk haruka submisaun ida ba Deputadu/a sira hotu. Versaun badak tuir mai:

Ami apresia Governu Timor-Leste nia esforsu no servisu maka’as ba medida preventiva hotu-hotu ne’ebé ho objetivu atu hakotu kontaminasaun surtu Covid-19 iha ita nia rain, no atu responde lalais ba dezastre naturais ne’ebé Timor-Leste foin hasoru. Kalamidade inundasaun ida ne’e hatudu frakeza iha ita nia infrastrutura, no hamosu pergunta importante kona ba oinsá mak Timor-Leste bele suporta povu no oinsá atu hamenus impaktu husi dezastre naturais iha futuru.

Atu responde ba situasaun ida ne’e, Governu no Deputadu sira presiza avalia fali proposta alterasaun ba Lei Nu 14/2020 kona ba OJE 2021. Liu husi karta ida ne’e, ami hakarak hato’o ami nia hanoin kona-ba oinsá mak OJE 2021 retifikativu bele haktuir prinsípiu justisa, igualdade no sustentabilidade.

Ami sujere katak Governu bele aplika fali ideia Subsídiu Uma Kain la’ós ho baze ba sira ne’ebé tama iha lista Seguransa Sosiál de’it, maibé halo mudansa balun atu asegura katak ema hotu hetan benefísiu ne’ebé hanesan hodi atinje justisa sosiál iha implementasaun subsídiu estraordináriu, ami sujere atu:

1. Kalkula montante subsídiu bazeia ba númeru membru uma kain, laho referénsia ba ema nia saláriu ka rejistrasaun ho Seguransa Sosiál.
   
   
2. Konsidera katak cerca sanitária husi Estadu Emerjénsia no dalan nasionál ne’ebé hetan estraga halo susar ba hirak ne’ebé mak presiza halo viajen ba munisípiu seluk atu hetan apoiu husi família, presiza inklui sira ne’ebé hela iha fatin aluga ka fatin ne’ebé independente husi família, hodi bele asesu mós ba subsídiu estraordináriu.

Ami apresia katak iha versaun primeiru husi alterasaun ba OJE 2021 ne’ebé Governu hato’o ona ba Parlamentu, Governu propoin atu muda fundus husi projetu no atividade balu, inklui alokasaun Fundu Infrastrutura nian ba Aeroportu no Projetu Tasi Mane, no alokasaun liu husi Dotasaun ba Governu Tomak ba viajen ba nasaun seluk, atu finansia medidas foun liu-liu atu responde ba situasaun hafoin dezastre naturais.

Hodi bele muda alokasaun ba reparasaun emerjénsia no intervensaun saúde no ekonómiku sira. Posibilidade atu halo levantamentu estraordináriu husi Fundu Petrolíferu mak hanesan opsaun ikus, karik laiha rekursu ne’ebé sufisiente husi fatin seluk.

Ami sujere atu maximiza transferénsia husi projetu sira ne’ebé atu finansia projetu ba iha atividade no prevensaun urjente sira, inklui haforsa no hakbiit liu tan koordenasaun di’ak iha liña Ministériu sira no parseiru dezenvolvimentu sira atu bele minimiza duplikasaun iha despeza atu apoiu povu no hadi’ak infrastrutura.

Ami hein katak Governu no Parlamentu Timor-Leste sei foti medida no desizaun ne’ebé matenek hodi garante katak povu hotu, inklui povu ki’ik sira, bele kontinua moris iha kondisaun lahó preokupasaun no mós la monu ba kondisaun grave ne’ebé rezulta husi pandemia no inundasaun ida ne’e.

Ba ita-boot nia atensaun, ami nafatin hato’o obrigadu barak.