08 June 2021

LH husu Parlamentu atu hametin proposta Lei Enkuadramentu Orsamentál

Link to this blog in English

Ohin ONG La’o Hamutuk entrega Submisaun ba Parlamentu Nasionál kona ba proposta Lei Enkuadramentu Orsamentál no Jestaun Finanseiru Públiku, no hato’o ami nia hanoin, analiza no sujestaun balu relasiona ho konteúdu no sistema sira iha proposta refere hodi haforsa no hadi’ak liu tan transparénsia, akontabilidade, no partisipasaun povu no sosiedade civil iha prosesu governasaun.

Peskizadóra La’o Hamutuk, Eliziaria Febe Gomes, halo aprezentasaun iha audiénsia ba Komisaun C, Parlamentu Nasionál, no nia observa katak proposta Lei ida ne’e “hanesan oportunidade importante atu hadi’ak liu tan frakeza sira iha prosesu orsamentál, no ami hein katak proposta alterasaun ne’e la’ós atu introdús frakeza foun sira.”

Modelu Orsamentu ba Kada Programa Presiza Inklui Definisaun

Ezbosu Lei ida ne’e determina katak Orsamentu Jerál Estadu sei tuir sistema Modelu Orsamentu ba Kada Programa. To’o agora, Governu uza Modelu ida ne’e bazeia ba definisaun ba ‘programa’ ne'ebé jerál liu, ho rezultadu katak implementasaun sistema ida ne’e iha impaktu ladi’ak ba transparénsia.  

Proposta Lei presiza inklui definisaun ba ‘programa’ ne’ebé konsistente no espesífiku. Opsaun ida mak atu haktuir sistema Nasoins Unidas mak dezenvolve, ho naran COFOG (Classification of the Functions of Government). Se ita uza sistema ida ne’e, ita bele kompara alokasaun ba programa sira iha kada tinan, no kompara ho nasaun seluk.

Presiza Mantén Nafatin Limitasaun ba Alokasaun ba Fundu Kontinjénsia

La’o Hamutuk enkoraja distintu Deputadu/a sira atu konsidera risku katak mudansa ba regra Fundu Kontinjénsia bele hamenus Parlamentu nia abilidade hodi haktuir sira nia knaar tuir Konstituisaun RDTL, atu aprova no monitoriza despeza estadu nian.

Lei Orsamentu no Jestaun Finanseiru Nu.13/2009 determina katak alokasaun ba Fundu ida ne’e la bele liu husi 5% husi valor OJE tomak. Artigu 32 iha proposta Lei Enkuadramentu Orsamentál kansela limitasaun ida ne’e, no troka ho kondisaun katak Fundu Kontinjénsia la bele ki’ik liu duké 2% husi valor OJE tomak. Realidade, gastu sira iha Fundu Kontijénsia nunka too 5%; foin lalais mak aumenta alokasaun ba 3.2% iha OJE 2021 retifikativu. Tinan hira sira liu ba Governu gasta ba Kontijénsia menus husi 2% husi orsamentu ne’ebé ezekuta ona. La’o Hamutuk sujere atu mantén nafatin limitasaun ba alokasaun ba Fundu Kontinjénsia.

Hametin Fornesimentu Dokumentu Sira ba Públiku no Asegura katak Informasaun Loloos

La’o Hamutuk observa katak iha nesesidade atu hametin artigu balu, atu asegura katak Governu ba futuru la bele deside ho arbiru ba dokumentu hirak ne’ebé mak bele fahe ba públiku no informasaun ne’ebé sira bele mantén hanesan segredu. Lei ida ne’e presiza define ho klaru dokumentu sira ne’ebé Governu iha obrigasaun atu fahe, no asegura katak konteúdu asesível no lejivel ba públiku liu husi konsidera lian iha hakerek sira no mós formatu. 

Submisaun husi La’o Hamutuk nota iha oportunidade iha artigu sanulu atu hametin transparénsia no kualidade informasaun.

Lei das Grandes Opções do Plano la Bele Hamenus PN nia Knaar

Proposta Lei ida ne’e, iha Artigu 47, introdús etapa foun iha prosesu orsamentál: Lei Grandes Opções do Plano. Lei das Grandes Opções do Plano iha objetivu atu estabelese dalan ba OJE tuir mai. Maibé, Artigu 47.9 estabelese oráriu ba prosesu aprovasaun Lei Grandes Opções do Plano ne'ebé kloot. Tuir Artigu ida ne’e, Parlamentu presiza aprova Lei Grandes Opções do Plano iha loron sanulu nia laran, depois de Governu submete ezbosu ba Parlamentu. 

La’o Hamutuk observa katak Lei foun ida ne’e la bele fó limitasaun ba Parlamentu, no presiza iha obrigasaun atu hala’o konsultasaun públiku.

Proposta Lei Enkuadramentu Orsamentu Jerál Estadu Loke Oportunidade atu Haktuir Prátika Di’ak ba Transparénsia no Akontabilidade

La’o Hamutuk hatudu katak iha oportunidade balun atu implementa prátika di’ak ne’ebé haktuir estandar internasionál, inklui implementa no publika Mid-Year review, publika Relatóriu Anuál, no obriga Governu fornese dadus iha formatu Excel (la’ós PDF de’it), hodi fasilita analiza. Submisaun sujere mós atu reforsa iha Lei ida ne’e ho sistema konsultasaun no partisipasaun públiku.

No comments:

Post a Comment