Sa polítika ida di’ak no oportunidade inklui mós dezafiu sira ne’ebé IX Governu sei hasoru

IX Governu Konstituisional ba Periodu 2023-2028, forma husi Partidu CNRT no Partidu Demokrátiku (PD). IX Governu rasik ho nia estrutura hamutuk 47, no públiku kestiona. Liu-liu NGO tanba ho estrutura boot, sei implika ba Orsamentu Estadu no iha esperiénsia estrutura boot sei halo mós burokrasia naruk. CNRT no PD iha ona esperiénsia ukun iha periodu tolu liu ba (IV, V no VI Governu). No iha tinan ida ne’e CNRT no PD halo koligasaun dala ida tan ho mehi hodi lori rai no povu ba moris di’ak. 

Iha kuaze periodu barak nia laran ho governasaun ne’ebé sempre troka ba malu, maibé seidauk iha serteza ruma ba estadu no nasaun ne’e nia vida ba tempu naruk, ita bele haree husi investimentu barak durante ne’e liu husi levantamentu Fundu Petrólifeiru hamutuk biliaun $15 ona ba Orsamentu Jerál Estadu, maibé kada tinan investimentu sira liu husi OJE bele hetan de’it reseita entre 10%-14% husi despeza orsamentu.

Nune’e iha governasaun foun ida ne’e, La’o Hamutuk organiza debate publiku (Meza Redonda) hodi konvida reprezentante Governu, Parlamentu Nasional, Akademia no La’o Hamutuk rasik, atu diskute Sa polítika ida di’ak no oportunidade inklui mós dezafiu sira ne’ebé IX Governu sei hasoru, hodi lori rai no povu ne’e iha serteza nia laran. Iha diskusaun naruk entre oradór sira ho partisipante sira. No partisipante sira husu mak oinsá atu governu tenke iha ona seriadade no kometimentu atu halo investimentu ba setór produtivu sira. 

Oradór sira iha Enkontru Meza Redonda mak hanesan:

• Exelénsia Vise Ministru Asuntu Parlamentár, Sr. Adérito Hugo da Costa
• Magnifico Reitor IOB, Sr. Pedro Ximenes
• Peskizadóra La’o Hamutuk, Sra. Eliziaria Febe Gomes.

Husi Membru Parlamentu Nasional, ami konvida Bankada FRETILIN hanesan opozisaun, maibé la hola parte tanba iha tempu hanesan halo hela diskusaun ba proposta Orsamentu Retifikativu 2023.