Kongratula Estadu Timor-Leste nia Pozisaun Ba Defende Povu Birmánia

Spanduk dehan “Ami nunka hetan tauk"
hafoin junta oho prisioneiru politiku nain haat.

Link to this blog in English.

Foin lalais ne’e, 31 Agostu 2023, La’o Hamutuk hato'o karta apresiasaun ida ba Sua Exelénsia Primeiru Ministru Sr. Kayrala Xanana Gusmão ba pozisaun firme ne’ebé Estadu Timor-Leste foti hodi defende no tau valór ba Direitus Umanus no prinsípiu demokrasia ba komunidade iha Birmánia ne’ebé hetan opresaun ba tempu naruk husi junta militár Mianmar. 

Asaun solidariedade ida ne’e, bele sai hanesan orgullu boot ba Timor-Leste hodi nafatin hatudu konsisténsia ita nian ba mundu kona ba oinsá nasaun ki’ik ida ne’e tane aas prinsípiu no valór umanu ne’ebé seidauk resolve hodi husik hela sofrimentu naruk ba povu Mianmar. 

La’o Hamutuk apoiu tebes Governu TL lamenta ho pozisaun husi governu rejime militár Mianmar nian ne’ebé espulse misaun diplomata liu husi reprezenta enkarregadu negósiu Timor-Leste iha Mianmar. Ne’e hatudu momoos rejime ditadura militár sei maka’as tebes iha Mianmar no impunidade kontinua buras. Ami kontinua husu ba ditadura militár iha Mianmar atu hapara forsa ne’ebé haterus no tortura povu ne’ebé inosente. 

Sistema ditadura sempre uza podér no forsa no nunka hatudu vontade di’ak, nune’e atu halakon sofrimentu hirak ne’e, tenke brani troka ba dalan ida demokrátiku. Husu ba lider nasaun ASEAN tomak atu labele taka matan no ignora sofrimentu barak ne’ebé Povu Mianmar hasoru tanba de'it interese komérsiu no polítiku.