13 July 2012

Hoban-an kle’an liu iha tahu mina-rai


Semana neen liu ba, Primeiru Ministru Xanana Gusmão formálmente nomea lider rua husi setór mina-rai no gas atu dezenvolve polítika investimentu ba fundu rikeza soberania Timor-Leste. Laiha kobertura husi media ka polítiku na’in sira, no asaun ida ne’e la mensiona durante kampaña eleisaun foin daudauk ne’e. Maske nune’e, La’o Hamutuk hare ida ne’e fó sinál konsentrasaun adisionál ne’ebé ba Timor-Leste nia rikeza limitadu iha setór petróleu, ne’ebé sei ameasa ba ita nia oan sira nia futuru.


La’o Hamutuk dala barak esplika oinsá malisan rekursu fó impaktu ba ekonomia, polítika no Governasaun Timor-Leste. Sintoma ida ne’ebé perigozu liu entre sintoma sira seluk mak prosesu halo desizaun polítika “kaptura ona” husi setór petróleu. Tanba esportasaun mina-rai no gas domina maka’as ba ita nia ekonomia no selu 97% despeza estadu iha 2011, mina-rai no gas atrai ema sira ne’ebé iha kapasidade, persuasivu no imajinátivu. Bainhira ema hirak ne’e halo di’ak sira nia servisu, sira sei halo proposta sira ne’ebé atraitivu no argumentu ne’ebé konvinsivu atu dezenvolve setór petróleu ne’ebé husik atensaun ba rekursu sira husi saúde, edukasaun, agrikultura, indústria ki’ik, infrastrutura rural no komponente esensiál sira seluk husi dezenvolvimentu ne’ebé sustentável, ekitavel no inkluzivu. Tanba ne’e mak projetu Tasi Mane sai xave sentral iha Planu Estratéjiku Dezenvolvimentu Nasionál, maske nia finansiamentu ne’e sei hamosu duvida hela, dala ruma mós sei imposivel atu implementa no sei kria kampu servisu uitoan liu.

Tinan kotuk, Governu no Parlamentu halo revizaun ba Timor-Leste nia Lei Fundu Petrolíferu, halakon regulamentu kona-ba gastu sustentável no investimentu ne’ebé seguru, no hafraku Fundu nia governasaun. Mudansa ida mak atu haboot Komité Asesoria ba Investimentu Fundu nian, ne’ebé sei dezenvolve polítika investimentu no halo rekomendasaun ba Ministru/a Finansa kona-ba oinsá Fundu ne’e tenke investe ba.

Iha 1 Juñu, Primeiru Ministru Xanana Gusmão hili membru foun rua ba Komité Asesoria ba Investimentu. Despachu No. 016/GPM/2012 nomea Francisco Monteiro no Gualdino da Silva atu hamutuk Olgário de Castro, Kevin Bailey no Torres Trovik. Diretora Tezoreira Sara Lobo Brites (responsavel ba polítika fiskál nasionál) no xefe Banku Sentrál Abraão de Vasconselos (responsavel ba polítika monetar Timor-Leste no Jestor Operasionál Fundu Petrolíferu) ba iha enkontru Komité Asesoria Investimentu maibé sira na’in-rua laiha ona votu.

Francisco no Gualdino partisipa ona enkontru Komité nian dala rua. Infelizmente, minutas husi enkontru sira ne’e seidauk tau iha website Banku Sentrál, no Jornál da República seidauk mós publika despachu ne’e iha sira nia website ka iha edisaun surat tahan nian.

Francisco da Costa Monteiro sai Prezidente ba kompañia mina-rai nasionál TimorGAP iha Setembru 2011. Iha inísiu 2003, Francisco servisu iha Alfredo Pires nia okos iha eskritóriu Prezidente Xanana Gusmão. Hafoin Primeiru Ministru Gusmão hili Pires nu’udar Sekretáriu Estadu Rekursu Naturais iha 2007, Francisco husik nia estudu Ph.D. kona-ba jeolojia iha rai li’ur hodi fila fali nu’udar Asesor Ezekutivu ba Pires. Francisco lidera Governu nia Task Force ba Sunrise no nu’udar Konsellu Ezekutivu ba Autoridade Nasionál Petróleu (ANP). Aleinde ne’e, Francisco reprezenta Timor-Leste iha órgaun supervizóriu nasaun rua Timor-Leste no Australia ba Area Konjuntu ba Dezenvolvimentu Petróleu (JPDA): Komisaun Konjuntu mak tau matan ba ANP no Komisaun Sunrise ne’ebé diskute asuntu tékniku kona-ba projetu Sunrise.

Nu’udar Prezidente TimorGAP, Francisco mak responsavel atu harii no opera projetu Tasi Mane ho osan dolar multi-biliaun, ne’ebé sei inklui baze fornesimentu ba operasaun petróleu iha tasi iha Suai, no refinaria petróleu ida iha Betano, planta LNG Sunrise iha Beaçu, auto-estrada 150 km, portu, aeroportu, nova sidade no infrastrutura seluk. Tasi Mane sei simu tokon $163 husi Orsamentu Estadu 2012 no sei presiza tan osan barak iha futuru.

Gualdino Carmo da Silva sai Prezidente ba Autoridade Nasionál Petróleu (ANP) bainhira harii iha 2008 hafoin nia servisu nu’udar Diretór Ezekutivu ba órgaun tuan ne’ebé muda ona ba ANP, Autoridade Dezignada ba Tasi Timor (TSDA). ANP mak asina kontratu Timor-Leste ho kompañia mina-rai sira, no regula aspetu tomak husi operasaun petróleu iha area Timor-Leste rasik no iha Area Konjuntu ba Dezenvolvimentu iha Tasi Timor, inklui esplorasaun, produsaun, prosesamentu, refinaria, distribuisaun no fan. ANP mós jere tenderizasaun ba kontratu esplorasaun foun no koleta maizumenus biliaun $2 iha royalti (FTP-First Tranche Petroleum) husi kompañia sira kada tinan. Maski osan tomak ne’ebé selu husi kompañia mina-rai sira tenke tama iha Fundu Petrolíferu, ANP hetan osan tokon balu diretamente husi kompañia ba sira nia atividade.

Despachu 016/GPM/2012 hateten katak “Sira na’in rua foun ne’ebé nomea hatudu ona esperiénsia iha setór petróleu no iha jestaun no investimentu.”

Maske Timor-Leste iha ema edukadu uitoan no peritu uitoan la signifika katak ema sira ne’ebé okupadu ho servisu seluk hodi responsavel atu regula no harii ita nia indústria petróleu atu gasta tan sira nia tempu ba jestaun investimentu finanseiru, area ida ne’ebé sira laiha treinamentu ka laiha esperiénsia. La’o Hamutuk hare katak karik iha razaun balu seluk bainhira atu hili Francisco no Gualdino ba iha Komité Asesoria Investimentu, razaun ne’e atu enkoraja investimentu Fundu Petrolíferu ba iha projetu petróleu iha Timor-Leste, partikulármente ba projetu Tasi Mane no kadoras Sunrise. Investidór privadu sira preokupa ba espetasaun projetu Tasi Mane ne’e atu fó returnu di’ak ida ba sira nia osan, no ami hanoin ida ne’e sei sai investimentu ida ne’ebé ladún matenek hodi fó risku ba úniku rekursu Timor-Leste nian.

Ami konkorda ho Ministra Finansa Emilia Pires ne’ebé hateten iha tinan kotuk: katak osan povo nian atu gasta ka investe atu dezenvolve Timor-Leste tenke apropriadu liu husi Orsamentu Estadu tuir prosesu ida ne’ebé transparente no demokrátiku. Desizaun sira ne’e tenke halo husi ita nia Parlamentu eleitu, la’ós husi “asesor investimentu sira.” Artigu 15.1 husi revizaun Lei Fundu Petrolíferu hateten katak Fundu bele investe de’it iha rai li’ur, iha jurizdisaun internasionál sira ne’ebé rekoñesidu, no ami espera katak ida ne’e sei kontinua atu tuir iha espíritu hanesan mós iha karta.

Iha inísiu Jullu, Komité Asesoria Investimentu simu publikasaun ida ne’ebé sira la hakarak bainhira jornál sira fó reportajen kona ba gravasaun segredu ida husi konversa. Iha kafé ida iha Darwin iha 2010, Prezidente Komité Asesoria Olgário de Castro gaba sola-an kona-ba osan dolar tokon balu atu fahe ba nia kolega sira, hodi hateten “Ha’u hakarak osan, la’ós podér.” La’o Hamutuk nia blog diskute revelasaun ida ne’e, espera katak Sr de Castro bele hamoos nia naran maibé ami foka sai katak biliaun $10 ne’ebé nia na’in ne’e nasaun ki’ik, kiak no foun no esperiénsia uitoan sai hanesan alvu ba tentasaun ba ema sira ne’ebé la onestu no kantén sira. Lasu ida husi tentasaun Asian Champ Investment iha 2009, no ita sente preokupadu ho Sr de Castro nia referénsia ba aspetu husi nauk-ten ne’ebé tenta atu nauk – inklui autór Datuk Edward Ong, konta bankária iha Swiss no Singapura, viajen ba London no akordu infrastrutura sira.

Komité Asesoria Investimentu hili Sr de Castro nu’udar Prezidente Komité “ba tinan ida iha tempu ne’ebá” iha 5 Maiu 2008, nia hetan eleitu fila fali dala ida tan, iha 15 Abríl 2010. Ami espera sira sei fó atensaun maka’as tan hodi proteje investimentu Timor-Leste nian duke saida mak sira halo tuir Artigu 2.2 husi sira nia prosedimentu regulasaun.

Komité Asesoria Investimentu daudauk ne’e iha ema na’in tolu ne’ebé sira nia prioridade dala ruma la’ós de’it seguransa no retornu ba Fundu Petrolíferu Timor-Leste, ne’ebé esensiál atu suporta estabilidade finansial no igualdade entre-jerasaun ba nasaun ida ne’e. Ami espera katak Komité labele lakon sira nia fokus, no Ministru/a Finansa no Primeiru Ministru iha Kintu Governu Konstitusionál sei garante katak ita nia rekursu sira sei proteje ho di’ak, investe ho matenek, no efetivamente uza ba benefísiu tempu naruk povo nian.

No comments:

Post a Comment